शिवसेना अधिकाऱ्यांची भन्नाट शक्कल, हॉटेलमध्ये ठेवली '४० गद्दार' आणि '५० खोके एकदम ओके' थाळी

पंढरपूर : 'मार्केटिंगसाठी कायपण हे' आपण नेहमीच पाहत आलो आहोत. अशीच एक भन्नाट कल्पना शिवसेनेच्या पदाधिकाऱ्याने मार्केटमध्ये आणली असून '४० गद्दार ही शाकाहारी' तर '५० खोके एकदम ओके' ही मांसाहारी थाळी आहे . पंढरपूर तालुक्यातील खर्डी येथे हॉटेल शिवम येथे या भन्नाट नावाच्या थाळ्या जेवणासाठी ठेवण्यात आल्या असून गद्दार थाळी ही ४० रुपयाला तर ५० खोके एकदम ओके ही मांसाहारी थाळी फक्त ५० रुपयात ठेवण्यात आली आहे .

राज्यामध्ये बुलेट थाळी, बाहुबली थाळी अशा अनेक थाळ्या प्रसिद्ध झाल्या होत्या. आता राज्यातील सत्तांतर नाट्यानंतर आलेल्या या दोन थाळ्या सध्या सर्वत्र चर्चेत येऊ लागल्या आहेत. राज्यात सत्तांतर झाले. यानंतर शिवसेनेकडून शिंदे गटाच्या आमदारांना सातत्याने गद्दार म्हणून हिणवले गेले. याच ४० गद्दारांच्या नावाने शाकाहारी थाळी तयार झाली. तर विधानसभेच्या आवारात '५० खोके एकदम ओके' नावाने झालेल्या घोषणावरुन अनोखी मांसाहरी थाळी तयार करण्यात आली आहे.

लग्नाच्या ३ महिन्यानंतर सगळं सुखाने असताना तरुणीने हे काय केलं, माहेरी जेवून घरी परतताच धक्कादायक कृत्य
विशेष म्हणजे राज्यातील वेगवेगळ्या थाळ्यामध्ये शिवसेनेची ४० गद्दार थाळी आणि ५० खोके एकदम ओके थाळी निश्चितच चर्चेचा विषय ठरत आहे. सांगोला रस्त्यांवर असलेल्या दत्तात्रय यादव आणि बंडू घोडके यांच्या हॉटेल शिवमवर ही थाळी सध्या उपलब्ध आहे. महत्वाचे म्हणजे या थाळीची किमंत ४० रु व ५० रु अशी ठेवण्यात आली आहे. पंढरपूर तालुका शिवसेनेचे तालुकाप्रमुख संजय घोडके यांच्या संकल्पनेतून ही थाळी निर्माण केली आहे.

सांगोला मतदारसंघाचे सेनेचे गद्दार आमदार शहाजीबापू पाटील यांनीही कडवट शिवसैनिकाच्या हातच्या प्रामाणिक अन्नाची चव चाखावी अशी मिश्किल टिपण्णी हॉटेल चालकाकडून होत आहे. या थाळीवर सध्या खवय्येगिरी चांगलाच ताव मारताना पहायला मिळत असून इथे शिवसैनिक आणि शिवसेना प्रेमी गर्दी करू लागले आहेत.