सिद्धेश्वर दर्शनासाठी सोलापुरात गर्दी

म. टा. वृत्तसेवा, सोलापूर
ओम नम: शिवाय, शंभो शिवशंकर, श्री सिद्धेश्वर महाराज की जय, असा जयघोष करीत सोलापूरचे ग्रामदैवत श्री सिद्धेश्वर महाराज मंदिरात श्रावणातील पहिल्या सोमवारी दर्शन घेण्यासाठी पहाटेपासूनच भक्तांच्या रांगा लागल्या होत्या. रात्री उशिरापर्यंत हजारो भक्तांनी सिद्धेश्वर महाराजांचे दर्शन घेतले.
पहाटे मंदिरातील गाभाऱ्यात पूजाविधी पार पडला. त्यानंतर गदगीस अभिषेक करून योगसमाधीची विधिवत मंत्रोपचाराच्या जयघोषात पूजा बांधण्यात आली. दरम्यान, सिद्धेश्वर मंदिरातील महाराजांच्या योगसमाधीवर आकर्षक फुलांची सजावट करण्याची परंपरा अखंडितपणे सुरू आहे. पहिल्या सोमवारी योगसमाधीवरील मेघडंबरी विविध फुलांनी सजविण्यात आली होती. सिद्धेश्वर भक्त गणपती घोडेकर यांच्यावतीने भारत फ्लॉवरचे भारत तेलसंग यांनी पांढरी आणि पिवळी शेवंती, पिवळा आणि केशरी झेंडू, आष्टर आदी पाच प्रकारची बंगळूरू येथून आणलेली सुमारे ६०० किलो फुले वापरून तब्बल २० कर्मचाऱ्यांनी दोन दिवस आणि एक रात्र कामातून मेघडंबरी सजविण्यासाठी कष्ट घेतले.