म. टा. वृत्तसेवा, सोलापूर
पंतप्रधान नरेंद्र मोदी यांनी ५०० आणि १०००च्या नोटा चलनातून रद्द करण्याचा निर्णय घेतल्यानंतर अनेकांची मोठी कोंडी होऊन बसली आहे. सोलापूर जिल्हा मध्यवर्ती सहकारी बँकेचीही मोठी कोंडी झाली आहे. बँकेकडे जमा असलेली सुमारे १३७ कोटींची रक्कम स्वीकारण्यास स्टेट बँक ट्रेझरी शाखेने नकार दिल्यामुळे ही सर्व रक्कम बँकेतच अडकून पडली आहे.
पंतप्रधान नरेंद्र मोदी यांच्या निर्णयाचा सर्वाधिक फटका सहकारी बँकांना बसल्याचे बोलले जात आहे. सोलापूर जिल्हा बँकेकडे १३७ कोटी तर नागरी बँकांकडे जमा झालेले १२३ कोटी ज्यामध्ये ५०० आणि १००० च्या नोटांचा समावेश असून, ही रक्कम स्वीकारण्यास बँकेने नकार दिल्यामुळे डीसीसी आणि नागरी बँकेची कोंडी झाली आहे. विविध बँकांकडे जमा झालेली रक्कम स्वीकारण्यास रिझर्व्ह बँकेकडून कोणत्याही सूचना आलेल्या नाहीत. सूचना येताच रक्कम स्वीकारण्याबाबत कार्यवाही सुरू केली जाईल, असे एसबीआयचे व्यवस्थापक सुहास गांधी यांनी सांगितले. दरम्यान, रिझर्व बँकेने सोलापूरसाठी पाठविलेल्या २०० कोटी रकमेपैकी बहुतांश रक्कम संपत आल्याने मंगळवारी बँकांमध्ये ग्राहकांच्या मोठ्या रंगा लागण्याची शक्यता आहे.