सोलापूरमधील बड्या नेत्याच्या मुलाच्या लग्नसोहळ्यात 'राष्ट्रवादी पुन्हा'चा आवाज घुमला; सगळ्यांनीच धरला ठेका

सोलापूर : राष्ट्रवादी काँग्रेसच्या वाटेवर असलेले सोलापूरमधील राजकीय नेते महेश कोठे यांचे चिरंजीव प्रथमेश कोठे यांचा शाही विवाहसोहळा आज पार पडला. या विवाहसोहळ्यात नवरदेवासह कोठे परिवाराने झिंगाट डान्स केला. या सोहळ्याला राष्ट्रवादी काँग्रेससह सर्वपक्षीय नेत्यांची मोठ्या संख्येने उपस्थिती होती. काँग्रेस नेते आणि माजी केंद्रीय गृहमंत्री सुशीलकुमार शिंदे, आमदार प्रणिती शिंदे , उज्वला शिंदे, राष्ट्रवादीचे आमदार दत्तात्रय भरणे, आमदार यशवंत माने तसंच ज्येष्ठ वकील उज्ज्वल निकम हेदेखील या लग्नसोहळ्याला उपस्थित होते.

प्रथमेश कोठे यांच्या विवाह सोहळ्यात महेश कोठे यांच्यासह देवेंद्र कोठे, स्वत: नवरदेव प्रथमेश कोठे आणि इतर पाहुणे मंडळी व मित्र परिवार यांनी राष्ट्रवादी काँग्रेस पक्षाच्या 'राष्ट्रवादी पुन्हा' या गीतावर चांगलाच ठेका धरला. त्यामुळे कार्यकर्त्यांमध्ये उत्साह दिसून आला.



कोठेंची भूमिका अजूनही संभ्रमात?

राज्यात महाविकास आघाडीचं सरकार असताना राष्ट्रवादी काँग्रेसचे अध्यक्ष शरद पवार यांनी महानगरपालिकेची सर्व सूत्रे महेश कोठे यांना देण्याचा निश्चित केले होते. मात्र सत्ताबदल झाल्यापासून महेश कोठे हे राष्ट्रवादीपासून दूर गेल्याची चर्चा होती. राष्ट्रवादीच्या अनेक बैठका सोलापूर जिल्ह्यातील विविध ठिकाणी होतात. मात्र या बैठकांना आणि पत्रकार परिषदांना महेश कोठे कधी दिसत नाहीत. परंतु आज महेश कोठे यांच्या मुलाच्या लग्नात राष्ट्रवादीच्या गाण्याचा आवाज घुमल्याने ते पक्षासोबतच राहणार असल्याचं बोललं जात आहे.