छावणी चालकांकडून
२८ कोटींची मागणी
सोलापूर
जिल्ह्यात सुरू असलेल्या जनावरांच्या छावण्यांवर मेअखेर ३० कोटी ७७ लाख १६ हजार १२४ रुपयांचा खर्च झाला आहे. यातील २ कोटी ६३ लाख ३२ हजार ५४९ रुपये छावणी चालकांना वितरित करण्यात आले आहेत. उर्वरित २८ कोटी १३ लाख ८३ हजार ५७५ रुपयांची मागणी सरकारकडे करण्यात आली आहे, अशी माहिती जिल्हा पुरवठा अधिकारी उत्तम पाटील यांनी दिली.
दुष्काळग्रस्त भागातील शेतकरी व पशूपालकांना दिलासा देण्यासाठी त्यांच्या जनावरांकरिता चारा छावण्या सुरू करण्याचा निर्णय घेतला. परंतु छावणी सुरू करण्यासाठी जाचक अटी व निकष लावल्यामुळे कोणीही पुढे येईना. शेवटी मार्चमध्ये छावण्यांबाबतचा निर्णय होऊन प्रत्यक्षात एप्रिलच्या मध्यापासून जिल्ह्यातील सांगोला तालुक्यात ५६, मंगळवेढा तालुक्यात ३५, करमाळा तालुक्यात ७ आणि बार्शी तालुक्यात १ अशा एकूण ९९ ठिकाणी चारा छावण्या सुरू झाल्या. यात जवळपास लहान मोठी मिळून ५८ हजार ७७४ जनावरे दाखल झाली. यासाठी २ कोटी ६३ लाख ३२ हजार ५४९ रुपये खर्च झाले आणि ही रक्कमही संबंधित चारा छावणी चालकांच्या बँक खात्यावर जमा केली. मे महिन्यात चारा टंचाईने गंभीर रुप धारण केल्याने छावण्यांची संख्या वाढवावी लागली. मे महिन्यात जवळपास १७४ ठिकाणी छावण्या सुरू झाल्या. यात सुमारे १ लाख ९६ हजाराच्या आसपास जनावरे दाखल झाली. याचा खर्च २८ कोटी १३ लाख ८३ हजार ५७५ इतका झाला असून, या रक्कमेची सरकारकडे मागणी करण्यात आली आहे. ही रक्कम प्राप्त होताच संबंधित चारा छावणीचालकांना वितरीत केली जाईल. तसेच जून महिन्यातही जवळपास छावण्या आणि जनावरांची संख्या मे महिन्या इतकीच असल्याचे जिल्हा पुरवठा अधिकारी पाटील यांनी सांगितले.
.........
सोलापुरात तुरळक पाऊस
सोलापूर :
सोलापूर शहर आणि परिसरात सोमवारी सकाळपासूनच ढगाळ वातावरण होते. हवेत गारवा ही जाणवत होता. दुपारी दोन वाजल्यानंतर मात्र पावसाला सुरुवात झाली. दुपारपासून सायंकाळपर्यंत कमी अधिक प्रमाणात तुरळक पाऊस सुरु होता. दरम्यान जिल्हाधिकारी कार्यालय परिसरात पावसाच्या पाण्याने कामानिमित्त येणाऱ्या नागरिकांची तारांबळ उडत आहे. सिटी सर्व्ह, जिल्हा उपनिबंधक कार्यालय, ग्राहक न्याय मंच तसेच ट्रेझरी शेजारील रस्त्यावर मोठे खड्डे पडून त्यामध्ये पावसाचे पाणी साचल्याने नागरिकांना त्या दलदलीतूनच ये-जा करावी लागत आहे.