डेंग्यूमुळे चार दिवसात सख्ख्या भावांचा मृत्यू

पंढरपूर

पंढरपूर तालुक्यातील आढीव गावात चार दिवसांच्या अंतरावर दोन सख्या भावांचा डेंग्यूमुळे मृत्यू झाला आहे. या घटनेने परिसरात भीतीचे वातावरण असून आरोग्य विभागाने विशेष मोहीम राबविण्याची मागणी नागरिकांनी केली आहे.

आढीव येथे सध्या तापाच्या आजाराने अनेक गावकरी आजारी आहेत. ते पंढरपुरात येऊन उपचार घेत आहेत. अशातच चार दिवसांपूर्वी शिवाजी मारुती धाकतोडे या ३७ वर्षांच्या ग्रामस्थाचा उपचारादरम्यान मृत्यू झाला होता. त्यांचा मृत्यू डेंग्युने झाल्याचे समोर आले होते. आता आज त्यांचाच मोठा भाऊ शहाजी धाकतोडे (वय ३९ ) यांचा उपचारादरम्यान मृत्यू झाल्याने परिसरात भीतीचं वातावरण पसरलं आहे. गावातील अस्वच्छता वाढल्याने डेंग्यूचा फैलाव झाला आहे. प्रशासन आणि आरोग्य विभागाने परिसरात तातडीने उपाययोजना सुरू करण्याची मागणी होतेय.