चंद्रभागा नदीत बुडून चार मुलांचा मृत्यू

मटा ऑनलाइन वृत्त । पंढरपूर

चंद्रभागा नदीत पोहण्यासाठी गेलेल्या चार मुलांचा बुडून मृत्यू झाला. पाण्याचा अंदाज न आल्यानं ही दुर्देवी घटना घडल्याचं सांगण्यात येतं.

गवळी समाजातील ही मुले आहेत. ही चारही मुले चंद्रभागा नदी परिसरात गायी चरण्यासाठी घेऊन गेले होते. दुपारी ४.३० वाजता ही मुले चंद्रभागा नदीवरील चंद्रभागा घाटाजवळ पोहण्यासाठी गेली होती. पावसामुळे नदीच्या पाण्याची पातळी वाढलेली होती. पोहताना त्यांना पाण्याचा अंदाज न आल्याने ही चारही मुले पाण्यात बुडाली. उपचारासाठी येथील उपजिल्हा रुग्णालयात आणल्यानंतर डॉक्टरांनी चारही मुले मयत झाल्याचे सांगितले. मृतांपैकी दोघांचे वय ८ वर्ष आणि इतर दोघे ६ वर्षाचे होते. या घटनेमुळे हळहळ व्यक्त केली जात आहे. दरम्यान उपजिल्हा रुग्णालयात डॉक्‍टरांनी व्यवस्थित उपचार केले नसल्याचा आरोप नातेवाईकांनी केला आहे. रुग्णालयासमोर संतप्त नातेवाईकांनी गर्दी केल्‍यामुळे पोलिस बंदोबस्त मागवण्यात आला आहे.