म. टा. वृत्तसेवा, सोलापूर
सोलापूरचे ग्रामदैवत श्री सिद्धेश्वर महाराजांची यंदाची गड्डा यात्रा कृती आराखड्यानुसारच करण्याचा निर्णय जिल्हाधिकारी रणजितकुमार यांच्या सोबत झालेल्या बैठकीत घेण्यात आला. होम मैदानावरील धुळीवर शेणाचा सडा मारण्याचा पर्याय पुढे आला आहे. मात्र, मागील वेळी वादग्रस्त ठरलेल्या आपत्कालीन रस्त्याबाबतचा निर्णय अद्यापही जैसे-थे असल्यामुळे नेमका काय निर्णय होतो, याकडे सर्वांचे लक्ष लागून आहे.
होम मैदानावर गड्डा यात्रा गेल्या अनेक वर्षांपासून भरत आहे. यात्रेसाठी महिनाभर होम मैदान गर्दीने फुलून गेलेले असते. मागील वर्षी होम मैदानावरील धुळीमुळे यात्रेकरूंना आजाराचे निमंत्रण मिळत असल्यामुळे आणि यात्रा निर्विघनपणे पार पाडण्यासाठी हरिभाई देवकरण-मार्केट पोलिस चौकी हा आपत्कालीन रस्ता मोकळा ठेवण्याचा आग्रह जिल्हाधिकारी तुकाराम मुंढे यांनी धरल्यामुळे मंदिर कमिटी आणि प्रशासनात मोठा वाद झाला होता. हा वादात अखेर मुख्यमंत्र्यांना लक्ष घालावे लागले होते. मात्र, यंदा पुन्हा देवस्थान कमिटीने वादग्रस्त आपत्कालीन रस्ता वापरणार असल्याची भूमिका घेतल्याने प्रशासन पेचात पडले आहे. त्यासाठी आता विविध १६ विभागांना आराखडे देण्याची सूचना करण्यात आली आहे. यंदा यात्रेबाबत प्रशासनाने सावध भूमिका घेतली असून, तडजोड होऊन यात्रा सुरळीत पार पडेल, अशी आशा निर्माण झाली आहे.