पंढरीत वैष्णवांचा मेळा; ५ लाख भाविक दाखल

सुनील दिवाण, पंढरपूर

टाळ-मृदुंगाचा गजर व हरिनामाचा जयघोष करीत महाराष्ट्राच्या दऱ्याखोऱ्यातून खळाळत वाहणारा विठ्ठलभक्तीचा प्रवाह सोमवारी चंद्रभागारूपी महासागरात विलीन झाला. आषाढी वारीने पंढरीस निघालेल्या संतांच्या पालख्यांसह सुमारे ५ लाख वैष्णवांचा दळभार आज (सोमवार) भूवैकुंठभूमी पंढरी नगरीत दाखल झाला.

पालखी सोहळे पंढरपूरमध्ये दाखल होताना नगरवासीयांच्या वतीने संतांसह वैष्णवांचे मोठ्या उत्साही व भक्तीमय वातावरणात स्वागत करण्यात आले. संतांच्या पालख्या शहरात दाखल होताच पंढरी नगरी १२ लाख लोकांनी भरून पावली. दरम्यान, फडणवीस सरकारने जाहीर केलेल्या नवीन मंदिर समितीची माहिती समजताच शहरातील सरगम चौकात सोहळ्याने शासनाच्या विरोधात ठिय्या आंदोलन सुरू केल्याने प्रशासनाची धावपळ उडाली. मुख्यमंत्री शहरात विविध कार्यक्रमांत व्यग्र असताना पालखी सोहळ्याच्या आंदोलनाने प्रशासनाने धावपळ करीत वारकरी नेत्यांच्या मानधरणीस सुरुवात केल्यावर पालखी सोहळे मार्गस्थ झाले. यानंतर पालकमंत्री विजय देशमुख आणि सदाभाऊ खोत या मंत्र्यांनी माऊलींच्या मठात सोहळ्यातील प्रमुख मानकरी आणि वारकरी नेत्यांसोबत चर्चा केली. कोणत्याही परिस्थितीत मंदिर समितीवर ५० टक्के वारकऱ्यांची नियुक्ती करावी या मागणीवर वारकरी संप्रदाय ठाम असल्याचा निरोप पालकमंत्र्यांनी मुख्यमंत्र्यांना दिला.

आज दुपारी साडेतीनच्या सुमारास मुख्यमंत्री पंढरपूरमध्ये दाखल झाले. यावेळी महसूलमंत्री चंद्रकांत पाटील, गिरीश महाजन, बबनराव लोणीकर यांच्यासह नवीन मंदिर समितीचे अध्यक्ष अतुल भोसले हे उपस्थित होते. पंढरपूर बाजार समितीवर उभारलेल्या कृषी प्रदर्शनाचे उद्घाटन मुख्यमंत्र्यांच्या हस्ते झाले. यावेळी शेतकरी मेळाव्यात त्यांनी कर्जमाफीचे समर्थन करीत विरोधकांवर टीकेची झोड उठवली. विश्रामगृहावर स्वच्छता दिंडीत मुख्यमंत्र्यांनी टाळ हातात घेऊन ठेका धरला.