सोलापूर जिल्हा परिषद आवारात खळबळ; पेट्रोलने स्वतःला पेटवण्याचा प्रयत्न

सोलापूर: झेडपी सीईओ दिलीप स्वामी यांच्या कार्यालयासमोर सोमवारी सकाळी मोठा गोंधळ झाला. पेट्रोल ओतून स्वतःला पेटवून घेण्याचा प्रयत्न करण्यात आला. मोहोळ तालूक्यातील वाफळे येथील सचिन राजू चव्हाण या व्यक्तीने अंगावर पेट्रोल ओतून पेटून घेण्याचा प्रयत्न केला. सुरक्षा रक्षकांनी सचिन चव्हाण यांचा प्रयत्न हाणून पाडला.

हा सर्व थरार सीईओ यांच्या कार्यालयासमोर घडत असल्याने बघ्यांची मोठी गर्दी जमली होती. अंगावर पेट्रोल अन् हातात काडीपेटी असल्याने झेडपीत मोठी खळबळ उडाली.

वाचा- जावयासाठी गुजराती समाजाला आरक्षण दिले; महाराष्ट्राच्या माजी मुख्यमंत्र्यांची मिश्किल टिप्पणी

सचिन चव्हाण यांनी दिलेल्या माहितीनुसार, मोहोळ तालूक्यातील वाफळे येथील माणिक नलावडे यांनी ग्रामपंचायतीची बेकायदेशीर जागा हडप करून व्यापारी गाळे बांधले. या बेकायदेशीर कामकाजाबाबत आंदोलन करण्यात आले तेव्हा झेडपी प्रशासनाकडून गाळे सील करण्यात आले होते. कोणती ही कायदेशीर परवानगी न घेता माणिक नलावडे यांनी सील तोडून व्यापारी गाळे खुले केले आहेत. यावर कारवाई व्हावी यासाठी चव्हाण यांनी सातत्याने प्रयत्न केला. मात्र मोहोळ बीडीओ अन् विस्तारधिकाऱ्यानी याकडे सोयीस्कर दुर्लक्ष केल्याचे चव्हाण यांनी सांगितले.

वाचा- २४ वर्षानंतर मुलांना मिळाली आईच्या प्रेमाची उब; वडिलांच्या निधानंतर झाली होती बेपत्ता

सीईओ स्वामींनी सर्व माहिती मागवली

सोमवारी सकाळी ११:३० वाजण्याच्या सुमारास सचिन चव्हाण यांनी सीईओ यांच्या कार्यालयाबाहेर पेटवून घेण्याचा प्रयत्न केला. या सर्व घडामोडी नंतर जिल्हा परिषद प्रशासनाने वाफळे येथील गाळयांची संपूर्ण माहीती मागवली आहे. बेकायदेशीर बांधकाम करणाऱ्यावर गुन्हा दाखल करण्याचे आश्वासन दिल्याचे सचिन चव्हाण यांनी माध्यमांशी बोलताना सांगितले.