म. टा. वृत्तसेवा, सोलापूर
सोलापूर महानगरपालिके सर्वसाधारण सभा वेळेत सुरू न केल्यामुळे संतप्त झालेल्या काँग्रेसच्या महिला पदाधिकाऱ्यांनी महापौर शोभा बनशेट्टी यांना आरती ओवाळून सभा सुरू करायला लावली. या वेळी महिला सदस्यांनी सत्ताधारी भाजपविरोधात जोरदार घोषणाबाजी केली.
सोलापूर महानगरपालिकेची सर्वसाधारण सभा गुरुवारी सायंकाळी चार वाजता बोलावण्यात आली होती. परंतु, साडेपाच वाजले तरी सभा सुरू झाली नाही. त्यामुळे, काँग्रेसच्या नगरसेविका फिरदोस पटेल, श्रीदेवी फुलारे, परवीन इनामदार संतापल्या. 'नगरसचिव, सभा सुरू करा,' 'एलईडीच्या वाटाघाडी संपल्या की नाही?,' अशा घोषणा दिल्या. शेवटी महिला सदस्यांनी महापौर कक्षाबाहेर जाऊन घोषणाबाजी सुरू केली. 'संकष्टी आहे, सभा लवकर सुरू करा' म्हणून आरती सुरू केली. संतापलेल्या महिला आरती घेऊन सभागृहात आल्या व महापौर कक्षासमोर ठिय्या मारला.