म. टा. वृत्तसेवा, सोलापूर
लोकशाहीर अण्णा भाऊ साठे आर्थिक विकास महामंडळातील सोलापूर प्रकरणातील एका अपहार प्रकरणातील मुख्य संशयित आरोपी आमदार रमेश कदम यांना १६ जानेवारीपर्यंत न्यायालयीन कोठडीत ठेवण्याचा आदेश सोलापूर जिल्हा न्यायालयाने सोमवारी दिला. दरम्यान, पोलिस कोठडीत पोलिसांनी आपला जाणीवपूर्वक छळ करून अपमानास्पद वागणूक दिल्याची तक्रार आमदार कदम यांनी न्यायालयासमोर केली आहे.
सोलापूरच्या आर्थिक गुन्हे शाखेच्या पोलिसांनी मागील बुधवारी आमदार कदम यांना मुंबईतून ताब्यात घेतले होते. गुरुवारी सकाळी कदम यांची सरकारी रुग्णालयात आरोग्य तपासणी केल्यानंतर त्यांना दुपारी न्यायदंडाधिकारी पंकज बिदादा यांच्या न्यायालयात हजर करण्यात आले असता न्यायालयाने त्यांना तीन दिवसांची पोलिस कोठडी सुनावण्यात आली होती. पोलिस कोठडी संपल्यानंतर कदम याना सोमवारी न्यायालयासमोर उभे केले असता तपासाच्या अनुषंगाने पोलिसांनी न्यायालयीन कोठडीची मागणी केली. त्यानुसार न्यायालयाने कदम यांना १६ जानेवारीपर्यंत न्यायालयीन कोठडीत ठेवण्याचे आदेश दिले. आमदार कदम यांनी यावेळी न्यायालयासमोर पोलिस कोठडीत असताना आपल्याला पोलिसांनी अपमानास्पद वागणूक दिली आणि छळ केला अशी तक्रार केली. या विरोधात आपण उच्च न्यायालय आणि मानवी हक्क आयोगाकडे तक्रार करणार असल्याचे आमदार कदम यांनी सांगितले. त्यानंतर कदम यांना वैद्यकीय तपासणीसाठी सरकारी हॉस्पिटलमध्ये पाठविण्यात आले. त्या नंतर त्यांची न्यायालयीन कोठडीत रवानगी करण्यात आली. आमदार कदम यांच्या कार्यकर्त्यांनी न्यायालय परिसरात मोठी गर्दी केली होती. त्यामुळे कडेकोट पोलिस बंदोबस्त ठेवण्यात आला होता.
असे आहे घोटाळा प्रकरण
लोकशाहीर अण्णा भाऊ साठे आर्थिक विकास महामंडळाच्या मुंबईतील कार्यालयातून ११ लाख ७५ हजार रुपये सुनील सुभाष चव्हाण या नावाने सोलापूर कार्यालयाला पाठविले होते. ती रक्कम आमदार कदम याच्या मोहोळ येथील कार्यालयात काम करणाऱ्या सुनील बचुटे याने काढून घेऊन वाहन खरेदी केले. या गुन्ह्यात बचुटेसह आठ जणांवर गुन्हा दाखल आहे. चौकशी दरम्यान महामंडळाचे तत्कालीन अध्यक्ष रमेश कदम यालाही आरोपी करण्यात आले आहे.