अखेर 'त्या' दोन पोलिसांवर हत्येचा गुन्हा दाखल

पंढरपूर:

साखर कारखान्याला ऊस वाहतूक करणाऱ्या ट्रॅक्टर चालकाने टेपचा आवाज वाढवल्याने दोन पोलिसांनी केलेल्या जबर मारहाणीत ट्रॅक्टर चालकाचा मृत्यू झाला आहे. या घटनेनंतर संतप्त जमावाने जोरदार आंदोलन केल्याने जमावाच्या दबावासमोर झुकत अखेर या दोन्ही पोलिसांवर भादंवि कलम ३०२ नुसार गुन्हा दाखल करण्यात आला आहे.

मानेगाव येथे रविवारी ही घटना घडली. ऊसाची वाहतूक करताना ट्रॅक्टर चालक प्रदीप कल्याण कुटे याने ट्रॅक्टरमधील टेपचा आवाज वाढवला होता. यावेळी पोलिसांसोबत प्रदीपची वादावादी झाली. संतप्त पोलिसांनी प्रदीपला जबर मारहाण केल्याने त्यात त्याचा मृत्यू झाला. मात्र पोलिसांनी अकस्मात मृत्यू म्हणून त्याची नोंद केली. त्यामुळे प्रदीपचे कुटुंबीय आणि ग्रामस्थ प्रचंड भडकले. रविवारी रात्रीच शेकडो ग्रामस्थ माढा पोलीस ठाण्यासमोर जमले आणि त्यांनी प्रदीपला मारहाण करणाऱ्या दोन्ही पोलिसांवर हत्येचा गुन्हा दाखल करण्याची मागणी लावून धरली. रात्री नऊच्या सुमारास पोलीस ठाण्याबाहेर प्रदीपचा मृतदेह आणून ग्रामस्थांनी ठिय्या आंदोलन केले. त्यामुळे वातावरण अधिकच चिघळले. अखेर पोलीस अधीक्षक मनोज पाटील यांच्यासह जिल्ह्यातील इतर अधिकारी रात्री उशिरा माढ्यात दाखल झाले आणि त्यांनी परिस्थिती नियंत्रणात आणली.

माढा दिवाणी न्यायाधीशांच्या समक्ष पंचनामा करून या घटनेस जबाबदार असलेले हवालदार दशरथ कुंभार आणि दीपक क्षीरसागर या दोघांवर आज पहाटे हत्येचा गुन्हा दाखल करण्यात आला . यानंतर मृतदेह शवविच्छेदनासाठी सोलापूरकडे पाठवण्यात आला असून या प्रकरणाचा तपास राज्य गुप्तचर विभागाकडे देण्यात आला आहे. या घटनेत मृत झालेला प्रदीप हा उस्मानाबाद जिल्ह्यातील भूम तालुक्यातील सोनगिरी येथील रहिवासी आहे.