पत्नीसह २ मुलींची हत्या करून स्वतःलाही संपवले

पंढरपूर:
पत्नीच्या संशयी स्वभावाला वैतागून पतीनं तिच्यासह दोन मुलींची हत्या केल्यानंतर स्वतःही गळफास घेऊन आत्महत्या केल्याची धक्कादायक घटना माळशिरस तालुक्यातील सुळेवाडी येथे घडली. येथील घाटात या चौघांचेही मृतदेह सापडले.

पोलिसांच्या माहितीनुसार, माळशिरस तालुक्यातील उंबरे येथे सुभाष अनुसे हा पत्नी आणि मुलींसह राहत होता. सुभाष आणि पत्नी स्वाती हे दोघेही शेती करत होते, तर ऋतुजा आणि प्रणिता या दोन मुली श्रीपूर येथील प्राथमिक शाळेत शिकत होत्या. स्वाती त्याच्यावर नेहमी संशय घेत असे. यातून दोघांमध्ये भांडणे होत होती. काल दुपारी पत्नी आणि मुलींना घेऊन अकलूज येथे रुग्णालयात जातो, असे सांगून सुभाष घराबाहेर पडला. मात्र, ते चौघेही रात्री उशिरापर्यंत घरी परतले नाहीत. ते चौघे हरवल्याची तक्रार सुभाषच्या भावाने अकलूज पोलीस ठाण्यात केली. पोलिसांनी त्यांचा शोध सुरू केला. सुळेवाडी घाटात त्यांचे मृतदेह सापडले. पत्नी स्वातीची दगडाने ठेचून हत्या करण्यात आली होती. तर ऋतुजा, प्रणिता आणि सुभाष यांचे मृतदेह एका झाडाला लटकलेल्या अवस्थेत आढळले. पोलीस उपअधीक्षक मंगेश चव्हाण यांनी घटनास्थळाची पाहणी केल्यानंतर चौघांचे मृतदेह विच्छेदनासाठी रुग्णालयात पाठवले आहेत.