​ भाविकांच्या सुविधांसाठीजनतेकडून सूचना मागविणार

म. टा. वृत्तसेवा, पंढरपूर
विठ्ठल मंदिर समितीकडून केवळ घोषणाच केल्या जात आहेत. या पूर्वीची एकही घोषणा पूर्ण झालेली नसताना आता मंदिर समितीने राज्यभरातील जनतेकडून भाविकांच्या सुविधा आणि विकासासाठी सूचना मागवण्याचा निर्णय घेतला आहे.
समिती स्थापनेपासून दांड्या मारणारे सदस्य आमदार राम कदम यांनी बुधवारच्या बैठकीला उपस्थिती लावली. बैठकीनंतर मंदिर समितीचे अध्यक्ष अतुल भोसले यांना पत्रकारांनी केवळ घोषणा बद्दल धारेवर धरल्यावर अनुभवी राम कदम यांनी बाजू सांभाळत आता राज्यभरातील जनतेकडून भाविकांच्या सुविधांसाठी सूचना मागवणार असल्याचे सांगितले. पंढरपूरचा विकास करताना भाविकांना चांगली दर्शन व्यवस्था देणे गरजेचे असल्याचे सांगत यासाठी प्रसिद्ध बांधकाम व्यावसायिक हाफिज कॉन्ट्रॅक्टर, जिमी मिस्त्री यांच्यासारख्या तज्ज्ञांनीही मदत घेतली जाणार असल्याचे राम कदम यांनी सांगितले. येणाऱ्या भाविकाला चांगले दर्शन, स्वच्छ शहरासाठी समिती काम करणार असून, कर्मचाऱ्यांना दिले जाणारे वेतन कमी असल्याने एका महिन्याच्या आत त्यात वाढ केली जाणार असल्याचे कदम यांनी सांगितले. या वेळी मंदिर समितीची नवीन वर्षांची दिनदर्शिका आणि डायरीचे प्रकाशन करण्यात आले.
दुसरा विजय दिन साजरा
दोन वर्षांपूर्वी सर्वोच्च न्यायालयाच्या निकालाने बडवे उत्पातांच्या ताब्यातून विठ्ठल मुक्त झाल्याचे प्रतीक म्हणून बुधवारी सलग दुसऱ्या वर्षी पुरोगामी संघटनांनी एकत्र येत विजय दिन साजरा केला. १५ जानेवारी २०१६ रोजी सर्वोच्च न्यायालयाने दिलेल्या ऐतिहासिक निकालात विठ्ठल मंदिराचा संपूर्ण ताबा सरकारकडे आल्यावर १७ जानेवारी रोजी सरकारने मंदिर ताब्यात घेतले होते. गेल्या वर्षी मंदिर समितीच्या वतीने पहिला विजय दिन साजरा केला. मात्र, या वर्षी न्यायालयाच्या आदेशानुसार आलेल्या मंदिर समितीने कोणताही कार्यक्रम न ठेवल्याने शहरातील पुरोगामी संघटनांनी एकत्र येत तुकाराम भवन येथे हा विजय दिवस साजरा केला.