'सीएम'च्या पूजेला विरोध; २ महिन्यानंतर जामीन

पंढरपूर

अडीच महिन्यापूर्वी मुख्यमंत्र्यांना आषाढी पूजेपासून रोखण्याचा इशारा देणारा सकल मराठा मोर्चाच्या रामभाऊ गायकवाडला अखेर ८१ दिवसानंतर मुंबई उच्च न्यायालयाने दिलासा दिला असून जामीन मंजूर केला आहे.

दोन महिन्यांपासून जेलमध्ये असणाऱ्या रामभाऊला समाजाने वाऱ्यावर सोडल्याची पोस्ट व्हायरल झाली होती. विशेष म्हणजे रामभाऊच्या कुटुंबानेही समाजाचे आभार मानले होते. मराठा आरक्षण दिल्याशिवाय मुख्यमंत्र्यांना पंढरपूरमध्ये पाऊल न ठेवू देण्याचा इशारा मराठा मोर्चाने दिला होता. यावेळी आंदोलनात पुढे असणाऱ्या रामभाऊ गायकवाडला १० ऑगस्ट रोजी अटक करण्यात आली होती. मात्र आता जवळपास ८० दिवस त्याला जामीन न मिळू शकल्याने त्याला जेलमध्येच राहावे लागले आहे. रामभाऊ गायकवाड हा गुरसाळे येथील शेतकरी कुटुंबातला तरुण आहे. तो आई व पत्नी आणि दोन लहान मुलींसह शेतातच राहतो.