संत विसोबा खेचर विशेषांकाचे प्रकाशन

मटा ऑनलाइन वृत्त । पंढरपूर

संतपरंपरेचा सामाजिक, सांस्कृतिक मागोवा घेणाऱ्या 'रिंगण' वार्षिकाच्या संत विसोबा खेचर विशेषांकाचे पंढरपूर येथील श्री विठ्ठल मंदिरात आषाढी एकादशीच्या मुहूर्तावर मुख्यमंत्री देवेंद्र फडणवीस यांच्या हस्ते प्रकाशन झाले.

दिवाळीचे अंक असतात तर महाराष्ट्राचा सर्वात मोठा सोहळा असलेल्या आषाढी एकादशीचे अंकही असायला हवेत, या भूमिकेतून 'रिंगण'ची सुरुवात झाली. याआधी संत नामदेव, संत चोखामेळा, संत जनाबाई आणि संत निवृत्तीनाथ यांच्यावरील विशेषांकांना अभ्यासक आणि वारकरी दोघांकडूनही उत्तम प्रतिसाद मिळाला होता. संतसाहित्यात रुची असणाऱ्यांना आता उपेक्षित संत विसोबा खेचर यांचा यातून नव्याने परिचय होणार आहे.

संत नामदेवांचे गुरू, लिंगायत साहित्यातील आद्य लेखक तसेच लिंगायत आणि वारकरी संप्रदायात समन्वय साधणारे महापुरुष, अशी संत विसोबा खेचर यांच्या कार्यकर्तृत्त्वाची ओळख या विशेषांकातून करून देण्यात आली आहे. संत विसोबा खेचर यांच्या प्रभावाच्या पाऊलखुणा शोधणारे आळंदी, बार्शी, औंढ्या नागनाथ या ठिकाणांचे रिपोर्ताज तसेच अनेक मान्यवर अभ्यासकांनी यात लेख लिहिले आहेत. सचिन परब आणि डॉ. श्रीरंग गायकवाड यांनी या अंकाचं संपादन केलं आहे.