आर्चीला नोटीस पाठवली नव्हती!: मुख्याध्यापक

मटा ऑनलाइन वृत्त । अकलूज

'सैराट'फेम आर्ची अर्थात, रिंकू राजगुरू हिला शाळेत गैरहजर राहिल्याबद्दल नोटीस पाठवण्यात आल्याचं वृत्त तिच्या शाळेच्या मुख्याध्यापकांनी फेटाळलं आहे. शाळा सुरू होऊन जेमतेम आठ दिवस झाले आहेत. त्यामुळं तिला नोटीस पाठवण्याचा प्रश्नच उद्भवत नव्हता, असं मुख्याध्यापकांनी स्पष्ट केलं आहे.

अकलूज येथील शिक्षण प्रसारक मंडळ संचालित जिजामाता विद्यालयात शिक्षण घेणारी रिंकू राजगुरू यंदा दहावीला गेली आहे. कालपर्यंत सर्वसामान्य विद्यार्थीनी असलेली रिंकू 'सैराट' चित्रपटामुळं एक सेलिब्रिटी बनली आहे. ठिकठिकाणी तिचे सत्कार-समारंभ व मुलाखती सुरू आहेत. त्यात बिझी असल्यानं सुरुवातीचे काही दिवस तिला शाळेत जाता आलं नव्हतं. त्यामुळं तिला मुख्याध्यापकांनी नोटीस पाठवल्याची चर्चा सोशल मीडियावर रंगली होती.

शाळेच्या मुख्याध्यापकांनी मात्र तसं काही नसल्याचं म्हटलं आहे. 'रिंकू राजगुरूला आम्ही कुठलीही नोटीस पाठवलेली नाही. शाळा सुरू होऊन अद्याप एक आठवडाही झालेला नाही. त्यामुळे आम्ही तिला नोटीस पाठवण्याचा प्रश्नच येत नव्हता. तीन महिन्यांपेक्षा जास्त काळ ती गैरहजर राहिली असती तर आम्ही पत्र पाठवलं असतं,' असं मुख्याध्यापकांनी सांगितलं.

मंगळवारी हजेरी लावली!

रिंकू राजगुरूच्या हजेरीची चर्चा सुरू असतानाच मंगळवारी तिनं शाळेत पहिला दिवस भरला. ती शाळेत आल्यामुळं सगळा माहोलच बदलून गेला होता. तिला भेटण्यासाठी विद्यार्थ्यांसह शिक्षकांनीही गर्दी केली होती.