​ निवृत्तीनाथांची पालखी जेऊरमध्ये विसावली

म. टा. वृत्तसेवा, पंढरपूर
त्र्यंबकेश्‍वर येथून पंढरपूरकडे निघालेल्या संत निवृत्तीनाथ पालखी सोहळा बुधवारी जेऊर येथे विसावला. आज, गुरुवारी पहाटे पालखी सोहळा कंदर मुक्कामाकडे मार्गस्थ होईल.
रावगाव येथे पहाटे जयंत गोसावी यांच्या हस्ते श्री निवृत्तीनाथांच्या पादुकांची विधीवत पूजा व आरती करण्यात आली. येथे भाविकांनी दर्शनासाठी गर्दी केली होती. पूजा व आरतीनंतर सकाळी साडेसात वाजता सोहळा रावगावहून जेऊर मुक्कामाकडे मार्गस्थ झाला. दुपारच्या भोजन व विश्रांतीसाठी सोहळा सकाळी साडेदहा वाजता करमाळा येथे पोहोचला. करमाळा नगरवासीयांनी निवृत्तीनाथ पालखी सोहळ्याचे मोठ्या उत्साही व भक्तीमय वातावरणात स्वागत केले. अल्पशा विश्रांतीनंतर सोहळा दुपारी साडेबारा वाजता जेऊरकडे मार्गस्थ झाला.
करमाळा-जेऊर या वाटचालीत अभंग, गवळणींनी वाटचाल रंगून गेली. आता प्रत्येकालाच विठूरायाच्या भेटीची ओढ लागली होती. प्रत्येकाच्या चेहऱ्यावरील उत्साह ओसंडून वाहत होता. पंढरी समीप आल्याने वारकऱ्यांच्या पायाला चंद्रभागेच्या प्रवाहाप्रमाणे गती आली होती. ढगाळ वातावरणाच्या अल्हाददायक वातावरणातच वारकरी मार्गक्रमण करीत होते. सोहळा सायंकाळी जेऊर समीप येताच मेघराजाने निवृत्तीनाथांच्या पालखी सोहळ्यावर मेघवृष्टी करण्यास सुरूवात केली. मेघराजा बरसू लागला तसे वारकरी चिंब होत आनंदाने नाचू लागले. टाळ, मृदुंगाच्या तालावर नाचत, गात अंगावर पावसाच्या सरी घेत जेऊर हद्दीत पोहोचला. आज, गुरुवारी सोहळा सकाळी शेलगाव वांगीमार्गे कंदर मुक्कामी पोहोचेल.