मोहोळ हादरले! बारावीच्या विद्यार्थ्याची हॉस्टेलच्या बाथरूममध्ये गळफास घेऊन आत्महत्या

सोलापूर: मोहोळ तालुक्यातील पोखरपूरच्या जवाहर नवोदय महाविद्यालयात, पारधी समाजातील बारावीच्या विद्यार्थ्याने गळफास घेऊन आत्महत्या केलीय. त्याच्या मृत्यूचे कारण अस्पष्ट असून त्याचा तपास मोहोळ पोलीस करीत आहेत. मात्र आत्महत्येची घटना घडल्यानंतर आम्हाला का बोलावले नाही म्हणून मृत मुलाच्या नातेवाईकांनी मयताचे शवविच्छेदन करायला विरोध करत मोहोळच्या मुख्य रस्त्यावर रास्ता रोको आंदोलन सुरू केलं आहे.

पोखरापूर, ता. मोहोळ येथे केंद्र शासनामार्फत चालविण्यात येणारे जवाहर नवोदय महाविद्यालय आहे. या महाविद्यालयात प्रवेश घेण्यासाठी पात्रता परीक्षा पास करावी लागते. आता या महाविद्यालयात ३५० विद्यार्थी निवासी शिक्षण घेत असून त्यापैकीच एक देवानंद ज्ञानेश्वर भोसले (वय वर्षे १७, मूळ गांव - मांगी, ता. करमाळा) हा बारावीत शिकत होता. दैनंदिन हजेरी झाल्यानंतर त्याने वसतिगृहातील बाथरूममध्ये गळफास घेऊन आत्महत्या केली. सोमवारी रात्री ८.३० वाजता जेवण विभागात हजेरी घेतल्यावर देवानंद हा गैरहजर असल्याचे शिक्षकांच्या लक्षात आले. त्यांनी लगेच त्याच्या मित्रांना देवानंदच्या रूमवर बोलावणे पाठवले. तेव्हा तो रुममध्ये नसून बाथरूम बंद असल्याचे विद्यार्थ्यांनी सांगितले असता शिक्षकांनी त्या बाथरूमकडे धाव घेत दरवाजा उघडण्याचा प्रयत्न केला. मात्र आतून कोणताच प्रतिसाद मिळाला नाही. तेव्हा पोलिसांना बोलावून दरवाजा तोडण्यात आला. तेव्हा देवानंदने नायलॉनच्या दोरीने गळफास घेतल्याचे आढळून आले. या प्रकरणी मोहोळ पोलिसांत अकस्मात मृत्यूची नोंद करण्यात आली आहे. मोहोळ पोलीस देवानंद भोसलेच्या मृत्यूच्या कारणांचा शोध घेत आहेत.

वाचा: आवडीचं जेवण नसल्याचं निमित्त होऊन घरात वाद पेटला आणि अनर्थ घडला!

देवानंदच्या नातेवाईकांनी या घटनेनंतर शाळा व्यवस्थापनाबद्दल संताप व्यक्त केला आहे. शिक्षकांवर गुन्हा नोंद करण्याची मागणी करत व देवानंदच्या शवविच्छेदनाला विरोध करत रास्ता रोको आंदोलन सुरू केले आहे.

वाचा: कापूस व्यापाऱ्याची तहसील कार्यालयासमोर आत्महत्या, सुसाइड नोट लपवली गेल्याचा आरोप