सोलापूर: भाजपला 'एमआयएम'ची साथ

म. टा. वृत्तसेवा, सोलापूर: सोलापूर महापालिकेतील विषय समित्यांच्या निवडणुकीत शिवसेनेला धडा शिकविण्यासाठी 'एमआयएम'ने सत्ताधारी भारतीय जनता पक्षाला मदत केल्यामुळे चार विषय समित्यांचे सभापतिपद भाजपला मिळाले. शिवसेनेला फक्त एकच समिती मिळाली, तीही लॉटरीमुळे. अंतर्गत गटबाजीचा शिवसेनेला जोरदार फटका बसला.

महापालिकेच्या सात विषय समित्यांच्या सभापतिपदासाठी मंगळवारी निवडणूक होती. भाजपला दूर ठेवण्यासाठी शिवसेना, काँग्रेस आणि राष्ट्रवादी काँग्रेसने वंचित बहुजन आघाडी आणि एमआयएमलाही सोबत घेतले. त्यांच्यातील सामंजस्यानुसार दोन समित्यांचे सभापतिपद एमआयएमला देण्याचे ठरले होते. शिवसेनेचे राजकुमार हंचाटे यांचा त्याला विरोध होता. भारतसिंग बंडूरवाले आणि अनिता मगर यांना सभापतिपदे मिळावीत, अशी त्यांची मागणी होती. ती शिवसेनेचे गटनेते महेश कोठे यांनी अमान्य केली. नाराज झालेल्या हंचाटे यांनी मगर यांना बरोबर घेऊन थेट भाजपच्या गटात प्रवेश केला. त्याचे फळ म्हणून मगर यांना वैद्यकीय सहायता समितीचे सभापतिपद मिळाले.

बंडूरवाले आणि मगर यांना हव्या असलेल्या समित्या एमआयएमला देण्यात आल्या. शिवसेनेच्या नाराज सदस्यांनी भाजपला मदत केल्याने तेथे एमआयएमला पराभव पत्करावा लागला. त्याचा वचपा म्हणून एमआयएमने महिला व बालकल्याण समितीसाठी इच्छुक असलेल्या एमआयएमच्या नगरसेविका तस्लिम शेख यांनी महिला व बालकल्याण समितीच्या निवडीवेळी भाजपच्या कल्पना कारभारी यांना साथ दिल्यामुळे ही समिती मिळविण्यात भाजप यशस्वी ठरला. निवडणुकीनंतर दिलेल्या आश्‍वासनाची पूर्ती न करणाऱ्या शिवसेनेने माहिती असतानाही पराभूत होणाऱ्या दोन्ही समित्या आम्हाला दिल्या. त्यामुळे आपण ही भूमिका घेतल्याचे तस्लिम शेख यांनी स्पष्ट केले.

महिला आणि बालकल्याण समिती - कल्पना कारभारी (भाजप)

वैद्यकीय आरोग्य सहायता समिती - अनिता मगर (शिवसेना बंडखोर, भाजप पुरस्कृत)

शहर सुधारणा - मेनका राठोड (भाजप)

विधी समिती - देवी झाडबुके (भाजप)

कामगार व समाजकल्याण - उमेश गायकवाड (शिवसेना)

मंडया व उद्यान - गणेश पुजारी (वंचित)

स्थापत्य -अनुराधा काटकर (काँग्रेस)

---------------------------------------------------------------------------------------------------