उघड्यावर शौचाला गेलेल्या महिलांसोबत फोटो सेशन

मटा ऑनलाइन वृत्त । सोलापूर

हागणदरी मुक्त गाव करण्याची मोहीम राबविणाऱ्या अधिकाऱ्यांनी अक्षरश: मर्यादांचं उल्लंघन करायला सुरूवात केली आहे. सांगोला तालुक्यातील एका गावात उघड्यावर शौचाला गेलेल्या महिलांच्या गळ्यात हार घालून जिल्हा परिषदेच्या अधिकाऱ्यांनी त्यांच्यासोबत फोटोसेशन केल्याची संतापजनक घटना घडली आहे. या प्रकारामुळे सोलापुरात अधिकाऱ्यांच्या या कृत्याचा निषेध व्यक्त केला जात आहे. मात्र असा काही प्रकार घडलाच नसल्याचा दावा या अधिकाऱ्याने केला आहे.

सांगोला तालुक्यातील चिकमहुद गावात ही घटना घडली. सोलापूर जिल्हा परिषदेचे मुख्य कार्यकारी अधिकारी डॉ. राजेंद्र भारूड हे चिकमहुद येथे आले होते. त्यांनी रात्री गावात मुक्कामही केला. त्यानंतर दुसऱ्या दिवशी पहाटे पाच वाजता त्यांच्या सहकाऱ्यांसोबत ग्रामपंचायत कार्यालयात आले आणि गावातील हागणदरीच्या ठिकाणांकडे मोर्चा वळवला. यावेळी शेताच्या मार्गावरील भागात उघड्यावर शौचाला जाणाऱ्या तिघांना तंबी देणेत आली. फुलांचे हार घालून त्यांचे 'स्वागत' करण्यात आले.

गुड मॉर्निंग पथकही त्यांच्यासोबत होते. हलगी आणि शिट्टीचा आवाज ऐकूण उघड्यावर शौचास बसणाऱ्यांची चांगलीच तारांबळ उडाली होती. याच दरम्यान उघड्यावर शौचाला बसलेल्या काही महिलांच्या गळ्यात हार घालून त्यांचा 'सत्कार' करण्याचा आततायीपणाही भारूड यांनी केला. कहर म्हणजे त्यांनी नंतर या महिलांसोबत फोटो काढून ते सोशल मीडियावर फिरवले. हे फोटो प्रेसनोटसह सोलापूरमधील पत्रकारांच्या व्हाटस्अप ग्रुपवर पाठवण्यात आल्यानंतर हा धक्कादायक प्रकार उघडकीस आला. उघड्यावर शौचाला बसणे ही या महिलांची चूक असली तरीही त्यांचे फोटो काढून ते फोटो सोशल मीडियावर टाकणे हे चुकीचे आहे. पोलीसही आरोपींच्या चेहेऱ्यावर काळे कापड घालतात. इथे मात्र ग्रामीण भागातल्या महिलांना सुविधांअभावी उघड्यावर शौचाला बसावे लागते त्याची शिक्षा म्हणून त्यांचे हार घातलेले फोटो सोशल मीडियावर फिरवले जात असल्याबद्दल संताप व्यक्त होत आहे.