पोलिसांच्या ताब्यातूनआरोपीचे पलायनएमआयडीसी पोलिस ठाण्यातील घटना

म. टा. वृत्तसेवा, सोलापूर
घरफोडीच्या गुन्ह्यात अटक केलेला आरोपी पोलिसांच्या हातावर तुरी देऊन पसार झाला आहे. नव्या वास्तूत स्थलांतरीत झालेल्या एमआयडीसी पोलिस ठाण्यात ही घटना घडली आहे. हरी मुरलीधर काळे (वय २४, रा. पारधी वस्ती, कुंभारी, ता. दक्षिण सोलापूर) असे पळून गेलेल्या आरोपीचे नाव आहे.
शहरातील बऱ्याच घरफोडीच्या गुन्ह्यात त्याचा समावेश असल्याची खात्री झाल्यानंतर एमआयडीसी पोलिस ठाण्यातील सहायक निरीक्षक चंद्रकांत वांबळे आणि त्यांच्या सहकाऱ्यांनी हरी काळेला शुक्रवारी रात्री शिताफीने अटक केली होती. पुढील तपासासाठी त्याला एमआयडीसी पोलिस ठाण्यात आणण्यात आले होते. त्यानंतर सहायक निरीक्षक वांबळे यांनी आरोपीला रात्रपाळीतील पोलिस नाईक नीलेश पाटील यांच्याकडे सुपूर्द केले होते. पाटील यांनी आरोपीला पहिल्या मजल्यावरील खोलीत ठेवले होते. पहाटे तीन वाजण्याच्या सुमारास पाटील यांना जाग आली, तेव्हा हरी काळे गायब झाल्याचे दिसून आले. या संदर्भात सहायक निरीक्षक वांबळे यांनी एमआयडीसी पोलिसात फिर्याद दाखल केली आहे.