सोलापूर: बाइकवरून फिरणारे कोंबडे पाहिलेत का?

सूर्यकांत आसबे, सोलापूर:

आतापर्यंत आपण 'अण्णा अण्णा' बोलणारा कोंबडा पाहिला. त्याचं कौतुकही झालं. पण सोलापुरात दोन कोंबड्यांना मात्र वेगळीच सवय जडलीय. या दोघांनाही चक्क दुचाकीवरून फिरण्याची सवय लागली आहे. त्यामुळे बाइकवरून ऐटीत फिरणारे सर्जा आणि राजा हे दोन्ही कोंबडे सगळ्यांच लक्ष वेधून घेत आहेत. पंचक्रोशीत चर्चेचा विषय ठरलेल्या या सर्जा-राजाला पाहण्यासाठी सावळेश्वर गावात एकच झुंबड उडाली आहे.

मोहोळ तालुक्यातील सावळेश्वर गावातल्या औदुंबर लवटे यांचे हे कोंबडे सध्या सोलापूर जिल्ह्यात कुतूहुलाचा विषय बनले आहेत. कारण लवटेंच्या या कोंबड्यांना दुचाकीचा जिव्हाळा लागला आहे. सुरुवातीला गाडीवर बसवल्यानंतर घाबरणाऱ्या या कोंबड्यांना आता मात्र गाडीवर बसायची एवढी आवड लागली आहे, की औदुंबर लवटे गाडीला चावी लावायच्या अगोदर कोंबडेच गाडीवर चढून बसतात.

औदुंबर लवटे चिंचोली एमआयडीसीत प्रीसीजन कंपनीत काम करतात. कोंबड्याप्रमाणे ससे पाळण्याचाही लवटेंना छंद होता. पण कामाच्या व्यापामुळे नंतर त्यांनी फक्त कोंबड्याच पाळायला सुरुवात केली. या लाडक्या कोंबड्यांना बसण्यासाठी गाडीच्या हँडलला खास स्टँड बनवले असून या स्टँडवर कोंबडे अगदी आरामात आणि रुबाबात बसतात. मग लवटे मोहोळ बाजारला जाऊ द्यात की इतरत्र फिरायला, हे कोंबडे कायम त्यांच्या सोबत असतात. त्यामुळेच आमच्या कोंबड्यांनाही ट्रेनिंग द्या, अशी मागणी लोकांकडून औदुंबर लवटेंकडे केली जात आहे.