वाखरी गावात एकाच रात्री तीन घरं फोडली!

मटा ऑनलाइन वृत्त । पंढरपूर

पंढरपूरमधील वाखरी गावात आजूबाजूच्या घरांना बाहेरून कड्या लावून तीन घरे चोरट्यांनी फोडली असून घरांतील किंमती ऐवज लंपास केला आहे. या प्रकाराने गावातील लोक भयभीत झाले आहेत.

मंगळवारी रात्री १ ते २ च्या सुमारास वाखरीतील पालखीतळ वाडीत हा चोरीचा प्रकार घडला. श्रीरंग शंकर सपकाळ यांचं घर तसेच बाजूची दोन घरे चोरट्यांनी फोडली आणि दागिने व रोख रक्कम असा सुमारे दीड लाख रुपयांचा ऐवज लंपास केला. चोरीसाठी चोरट्यांनी डाळीचे डबेही तपासले. हा प्रकार घडला तेव्हा श्रीरंग सपकाळ यांची पत्नी घरात एका खोलीत झोपली होती. त्या खोलीला बाहेरून कडी लावून चोरट्यांनी डल्ला मारला. सकाळी उठल्यानंतर ही बाब त्यांच्या निदर्शनास आली.

दरम्यान, याप्रकरणी पंढरपूर पोलीस ठाण्यात तक्रार दाखल करण्यात आली असून पोलिसांनी घटनास्थळी जाऊन पाहणी केली व माहिती घेतली. अद्याप चोरांचा शोध लागू शकलेला नाही.