माळीनगरमध्ये रंगले तुकोबांचे उभे रिंगण

म. टा. वृत्तसेवा, पंढरपूर
ज्ञानोबा माउली.., तुकाराम...च्या जयघोषात आणि टाळ मृदंगाचा गजरात जगद्गुरु तुकाराम महाराजांच्या पालखी सोहळ्याचे माळीनगरमध्ये पहिले उभे रिंगण मोठ्या उत्साहात पार पडले. सायंकाळी पालखी सोहळा बोरगाव मुक्कामी विसावला.
पालखी सोहळा सकाळी सात वाजता अकलूजमधील मुक्काम हलवून माळीनगरकडे उभ्या रिंगणासाठी व दुपारच्या विसाव्यासाठी येऊ लागला. तुळशी वृंदावने व जलकलश घेतलेल्या महिला, भगवे ध्वज व हाती टाळ मृदंग असलेले वारकरी माळीनगरमध्ये प्रवेशले आणि प्रसन्नतेची अनुभूती भाविकांना सुखावून गेली. तुकोबांचा रथ रिंगण सोहळ्याच्या ठिकाणी येताच वारकऱ्यांनी ज्ञानोबा तुकोबांच्या जयघोषाचा गजर केला. रिंगण सोहळा पाहण्यासाठी पंचक्रोशीतील नागरिकांनी रिंगणाच्या दुतर्फा मोठी गर्दी केली होती. दिंड्यातील वारकरी, टाळ मृदंग वादनात दंग होते. तर महिला फुगड्या खेळणाचा आनंद लुटत होत्या. नऊच्या दरम्यान चोपदारांनी रिंगण लावले. धवलसिंह मोहिते-पाटील यांच्या सरदार या अश्वावर आरूढ झालेल्या बाळासाहेब जाधव यांनी वेगाने दौड मारली. तर स्वारविणा असलेल्या पेटबाभुळगावच्या राजानेही दौड मारली. नेत्रदीपक दोन दौड मारल्या गेल्या. रिंगण सोहळ्या दरम्यान अलिखित शिस्तबद्ध नियमांचे दर्शन घडले. पोलिस व महिला कमांडो पथकाने रिंगणाच्या दोन्ही बाजूला दोरी धरून सुरक्षा भक्कम केली होती. अश्व पुढे जाताच भाविक टापाखालची माती कपाळी लावण्यासाठी दोरी बाजूला सारून रिंगणात उतरत होते.

पालखीच्या स्वागताची व व्यवस्थेची जय्यत तयारी येथील सासवड माळी शुगर फॅक्टरीच्या वतीने करण्यात आली होती. उभे रिंगण सोहळा पार पडल्यानंतर पालखी प्रशालेच्या प्रांगणातील खुल्या नाट्यगृहात विसावली. दुपारी साडेबारा वाजता पालखी सोहळा बोरगाव मुक्कामासाठी मार्गस्थ झाला.