तुकोबांच्या पालखीचे माळीनगरात पहिले उभे रिंगण

पंढरपूर : जगद्गुरू संत तुकोबांच्या पालखीचे संत गहिनीनाथांची नगरी माळीनगरात पहिले उभे रिंगण पार पडले. तुकोबा...तुकोबाचा अखंड गजर, विठुरायाच्या दर्शनाची आस आणि गळ्यात वीणा, हातात टाळ घेऊन पळणारे वारकरी अशा वातावरणात हे रिंगण पार पडले. तोफांची सलामी देत माळीनगरात पालखीचे स्वागत करण्यात आले. पालखीचा रात्रीचा मुक्काम बोरगाव येेथे होता.
भक्तिसागरात चिंब भिजलेल्या भोळ्या-भाबड्या वारकऱ्यांसमवेत विठुरायाकडे निघालेल्या श्री संत तुकाराम महाराज पालखी सोहळा माळीनगरात येत असताना येथील दि माॅडेल विविधांगी प्रशालेचे लहान मुला-मुलींच्या बालवारकऱ्यांची दिंडीही या पालखी सोहळ्यात सहभागी झाली होती.भक्तीरसपूर्ण आणि विठ्ठलमय वातावरणात पालखी सोहळा पुढे सरकत माळीनगर रोडवरील श्रीहरीनगर येथे येऊन थांबला.
पताकाधारकवारकरी,तुळशीधारक महिला,विणेकरी,पकवाजवादक,टाळकरी,रस्त्याच्या दोन्ही बाजूला रांगाकरून भजन व टाळ मृदंगाच्या गजरात दंग झाले होते. अश्वांच्या पूजेनंतर संत तुकाराम महाराज संस्थानच्या बाभूळकरांच्या अश्वाने उभ्या रिंगणात प्रथम फेरी मारली. नंतर (कै.) प्रतापसिंह मोहिते-पाटील यांचा अश्व शूर याच्यावर घोडेस्वार हातात पताका घेवून स्वार झाला. अतिशय वेगाने धावणाऱ्या या अश्वाने तुकोबांच्या पादुकांचे दर्शन घेवून दोन फेऱ्या पूर्ण केल्या. आसमंत व्यापून टाकणारा टाळ मृदंगाचा निनाद, तुकोबा तुकोबा नामाचा अखंड गजर, अन् मनी विठुरायाच्या भेटीची आस अशा भक्तिपूर्ण वातावरणात उभ्या रिंगणातील अश्वांची नेत्रदीपक दौड हृदयात साठवीत माळीनगर येथे लाखो भाविकांनी उभ्या रिंगणाचा मनमुराद आनंद लुटला. यानंतर लगेचच अश्वांच्या पाऊल खुणांचे दर्शन घेण्यासाठी भाविकांची झुंबड उडाली होती.
रिंगण सोहळा संपल्यानंतर माॅडेल हायस्कूलच्या मैदानावरील ओपन थिएटर मध्ये पालखी सोहळा विसवला. सासवड माळी शुगर फॅक्टरीचे संचालक मोहन लांडे व त्यांच्या पत्नी संध्या लांडे यांच्या हस्ते तुकाराम महाराजांच्या पादूकांची षोडशोपचारपूजा व महाअभिषेक करण्यात आला. दुपारी १२ वाजता तुकाराम महाराज पालखी सोहळा बोरगावच्या दिशेने रात्रीच्या मुक्कामासाठी मार्गस्थ झाला.