​ विठ्ठल मंदिरात मारामारी करणारे दोन कर्मचारी निलंबित

म. टा. वृत्तसेवा, पंढरपूर
विठुरायाच्या दर्शनासाठी आलेल्या भाविकांकडून पैसे घेऊन झटपट दर्शन देण्याच्या कारणावरून मंदिर समितीच्या दोन हंगामी सुरक्षा रक्षकांमध्ये हाणामारी झाली होती. या प्रकरणी समितीचे अध्यक्ष अतुल भोसले यांनी सुरक्षा रक्षकांवर निलंबनाची कारवाई केली.
काही दिवसांपूर्वी मंदिराच्या एका पुजाऱ्याने भाविकाला मारहाण केल्याची घटना घडली होती. त्यावेळी मंदिर व्यवस्थापन करणारी समितीच अस्तित्वात नसल्याने समितीचे कर्मचारी मंदिराचे कारभारी बनले होते. समिती व्यवस्थापनाचे कर्मचाऱ्यांवर नियंत्रणच राहिले नसल्याने पैसे घेऊन भाविकांना दर्शनाला सोडण्याचा धंदा काही कर्मचाऱ्यांनी सुरू केला होता. त्यातूनच २३ जुलै रोजी सुरक्षा रक्षक पांडुरंग साळुंखे आणि नारायण वाघ यांच्यात भाविकांना दर्शनाला सोडण्यावरुन चक्क हणामारी झाल्याने मंदिराचा कारभार चव्हाट्यावर आली आहे. या घटनेनंतर मंदिराचे अध्यक्ष अतुल भोसले यानी तातडीने या दोघांना निलंबित केले असले तरी या कर्मचाऱ्यांना कडक शिस्त लावल्याशिवाय भाविकांना विठूरायाचे व्यवस्थित दर्शन होणार नाही. या सर्व प्रकाराचे सीसीटीव्ही फुटेज मंदिर व्यवस्थापनाकडे असले तरी हे प्रकरण गुंडाळण्याची व्यवस्थापनाची तयारी दिसते, हे फुटेज प्रसारमाध्यमांना देण्यास प्रशासनाने स्पष्ट नकार दिला आहे.