म. टा. प्रतिनिधी, ठाणे
डोक्यात दगड घालून निर्घृण हत्या करणाऱ्या एका आरोपीला स्थानिक गुन्हे शाखेच्या वाशिंद युनिटने दोन तासांत अटक करून गुन्हा उघडकीस आणला. पैसे लंपास करण्याच्या उद्देशाने आरोपीने हत्या केल्याची बाब चौकशीत पुढे आली असून गणेशपुरी पोलिस ठाण्यात गुन्हा दाखल करण्यात आला आहे.
भिवंडीतील दिघाशी येथील बळीराम शांताराम जाधव (४०) यांच्या हत्येचा प्रकार शुक्रवारी सकाळी समोर आल्यानंतर खळबळ उडाली होती. या गंभीर गुन्ह्याचा समांतर तपास गुन्हे शाखेच्या वाशिंद युनिटचे सहाय्यक पोलिस निरीक्षक धनंजय पोरे, अविनाश पाटील, पोलिस हवालदार खोमणे यांच्या पथकाकडून सुरू होता. सकाळी ११ वाजून १५ मिनिटांनी माहिती मिळाल्यानंतर गुन्हे शाखेचे पथक घटनास्थळी दाखल झाले. अंबाडी गावाच्या हद्दीत जाधव यांचा मृतदेह मिळाला होता. त्यामुळे पोलिसांनी संपूर्ण परिसर पिंजून काढला. आरोपीचा शोध घेत असताना गुरुवारी घटनास्थळी कोण-कोण आले होते, याची माहिती काढली. सीसीटीव्ही फुटेजची तपासणी केल्यानंतर अखेर आरोपीचे नाव निष्पन्न झाले. दुपारी २ वाजता आरोपी पोलिसांच्या ताब्यातही आला. अनिल तुळशीराम वाघे रा. अंबाडी असे या आरोपीचे नाव असून तो मजुरीचे काम करतो. त्याच्या चौकशीत पैशासाठी ही हत्या केल्याची बाब निष्पन्न झाली.
जाधव मद्यप्राशन करून बसले होते. त्यावेळी तेथे एक शंभर रुपयांची नोट पडली होती. जाधव यांच्याकडे आणखी पैसे असू शकतात. ते सर्व पैसे काढून घेण्याच्या उद्देशाने आरोपीने जाधव यांच्या डोक्यात दगड घालून हत्या केल्याची कबुली आरोपीने दिली आहे. या गुन्ह्याचा पुढील तपास गणेशपुरी पोलिस ठाण्यातील सहाय्यक पोलिस निरीक्षक महेश सागडे करत आहेत.