म. टा. वृत्तसेवा, कल्याण :
कल्याण डोंबिवली महापालिका क्षेत्रातील करोना बाधितांची संख्या दिवसेदिवस वाढत असून डायलिसिसचे उपचार घेणाऱ्या आणि कॅन्सर रुग्ण असलेल्या रुग्णांनाही करोनाची लागण झाल्यामुळे पालिका प्रशासनाच्या आव्हानात भर पडली आहे. अत्यवस्थ करोना रुग्णांची संख्या वाढत असताना त्यांना उपचारासाठी आवश्यक असणाऱ्या व्हेंटिलेटरची कमतरता भासत असल्यामुळे खासदार डॉ. श्रीकांत शिंदे यांच्या प्रयत्नातून पालिकेला १० व्हेंटिलेटर प्राप्त झाले आहेत. कृष्णा डायग्नोस्टिक सेंटरकडून पालिकेच्या आरोग्य विभागाला देण्यात आलेले हे व्हेंटिलेटर आधुनिक पद्धतीचे अमेरिकन बनावटीचे आहेत. तर रुग्णाला एका रुग्णालयातून दुसऱ्या रुग्णालयात व्हेंटिलेटरबरोबर शिफ्ट करता येणार असल्यामुळे रुग्णाचे प्राण वाचविण्यास याची मोठी मदत होऊ शकेल, असा दावा खासदार डॉ. शिंदे यांनी केला आहे.
पालिका क्षेत्रातील करोना रुग्णाची संख्या दिवसागणिक वाढत असून महापालिका क्षेत्रात आतापर्यंत ११४ रुग्ण सापडले असून यातील जवळपास ४० रुग्णांवर कल्याण डोंबिवली महापालिका क्षेत्रांतील रुग्णालयात उपचार सुरू असून दिवसागणिक रुग्णांची संख्या वाढत आहे. वाढत्या रुग्णांच्या पार्श्वभूमीवर उपचारासाठी लागणारी यंत्रसामुग्री कमी पडत असल्यामुळे विविध संस्था आणि कंपन्यांना खासदार डॉ शिंदे यांनी मदतीचे आवाहन केले आहे. आपल्याला शक्य होईल तितकी या लढाईत प्रत्येकाने मदत करून आपले योगदान द्यावे, या खासदारांच्या आवाहनाला प्रतिसाद देत पालिका रुग्णालयात डायग्नोस्टिक सेंटर चालविणाऱ्या कृष्णा डायग्नोस्टिक सेंटरकडून पालिका रुग्णालयासाठी मदत मिळाल्याची माहिती आज खासदार शिंदे यांनी दिली.