११ वर्षांच्या मुलाची उल्हासनगरात हत्या

म. टा. वृत्तसेवा, उल्हासनगर

उल्हासनगरात एका ११ वर्षीय मुलाची गळा चिरून निर्घृण हत्या केल्याची धक्कादायक घटना समोर आली आहे. हर्ष आल्हाट असे या चिमुकल्याचे नाव असून त्याची हत्या नेमकी कोणी आणि का केली, याचा उलगडा करण्याचे आव्हान पोलिसांसमोर आहे.

मंगळवारी सकाळी एका ११ वर्षीय मुलाच्या हत्येने संपूर्ण शहर हादरले. उल्हासनगर कॅम्प नंबर ५ गणेश नगर परिसरात राहणारा हर्ष आल्हाट हा आपल्या आईसोबत होता. हर्षची आई उल्हासनगर येथील एका कपड्याच्या कारखान्यात हर्षची आई काम करत होती. सोमवारी रात्री हर्ष आपल्या आईसोबत असतांना तो लघुशंकेसाठी बाहेर गेला होता. मात्र बऱ्याच वेळानेही हर्ष परत आला नाही. त्यामुळे हर्षच्या आईने त्याची शोधाशोध सुरू केली होती. मात्र हर्षची आई काम करत असलेल्या कपड्याच्या कारखान्याच्या शेजारील भाड्याने राहत असलेल्या जाकीर मोहम्मद अन्सारी याच्या खोलीमध्ये हर्षचा मृतदेह आढळून आला. ज्या घरात हर्षची हत्या झाली, त्या घरातील चार व्यक्तींना चौकशीसाठी ताब्यात घेतल्याची माहिती परिमंडळ चारचे पोलिस उपायुक्त अंकीत गोयल यांनी दिली. आपापसातील वादातून ही हत्या झाल्याची शक्यता पोलिस उपायुक्त गोयल यांनी वर्तवली आहे.