हरिश्चंद्रगडावर कल्याणचे २० ट्रेकर अडकले

म. टा. प्रतिनिधी, ठाणे

कल्याणचे डॉ. हितेश अडवाणी हे २० जणांसोबत हरिश्चंद्रगड येथे ट्रेकिंगसाठी गेले असता तेथून पुढे दीड किलोमीटरवर कोकणकडा येथे ८०० फूट खाली हे सर्व ट्रेकर अडकले आहेत. या ट्रेकरना एनडीआरएफच्या मदतीने वाचविण्याचे प्रयत्न सुरू असून जिल्हाधिकारी राजेश नार्वेकर यांनी कल्याण तहसीलदार आणि पोलिस यांनादेखील यासंदर्भात समन्वय ठेऊन ट्रेकर्सची सुटका करण्याचे निर्देश दिले आहेत.

डॉ. अडवाणी यांच्याशी संपर्क झाला असून त्यांच्यासोबत पाच महिला व १७ पुरुष आहेत. कोकणकड्यापासून खाली ८०० फूट ते आहेत. अंधार असल्याने त्यांना मार्ग सापडत नाही. त्यामुळे बचाव पथकाला त्यांचे नेमके ठिकाण पाठविण्यास सांगितले आहे. जिल्हाधिकाऱ्यांनी ठाणे ग्रामीण पोलिस तसेच जुन्नर पोलिसांनादेखील या घटनेविषयी कळविले असून तहसीलदार अमित सानप या मोहिमेवर लक्ष ठेवून आहेत, अशी माहिती जिल्हा प्रशासनाकडून देण्यात आली आहे.