'ती' २१ व्या वर्षी झाली नगरसेविका!

मटा ऑनलाइन वृत्त । ठाणे

ठाण्यात घवघवीत यश मिळवणाऱ्या शिवसेनेने अवघ्या २१ वर्षांच्या तरुणीला नगरसेवक होण्याचा मान मिळवून दिला आहे. प्रियांका अविनाश पाटील ही तरुणी शिवसेनेच्या तिकीटावर पालिका निवडणुकीच्या आखाड्यात उतरली होती. मतदारांनी तिच्या पारड्यात विजयाचं दान टाकत तिला पालिकेत पाठवलं आहे. ठाण्यातील ती सर्वात तरुण नगरसेविका ठरली आहे.

ठाण्यातील प्रभाग क्र. २४ ब मधून प्रियांका विजयी झाली आहे. तिने राष्ट्रवादीच्या उमेदवाराला पराभवाची धूळ चारली. प्रियांकाचे वडील शिवसेनेचे शाखाप्रमुख असून तीन अपत्ये असल्याने ते निवडणूक लढवू शकले नाहीत. त्यामुळे प्रियांकाला संधी देण्यात आली आणि तिने या संधीचं सोनं करत राजकारणात दणक्यात 'एंट्री' केली आहे.

प्रियांका डोंबिवलीतील जोंधळे कॉलेजमध्ये इंजीनिअरिंगच्या शेवटच्या वर्षात शिकत असून शिक्षण आणि राजकारण अशी सांगड घालतच तिला पुढची वाटचाल करावी लागणार आहे. प्रियांकाने या विजयाबद्दल आनंद व्यक्त केला असून लोकांचा विश्वास सार्थ ठरवेन, असेही म्हटले आहे.