वसई-विरारमध्ये आणखी २२० जणांना करोनाची लागण

वसई : वसई-विरारमध्ये मंगळवारी दिवसभरात २२० करोनारुग्ण आढळून आले आहेत. तर, दोघांचा मृत्यू झाला आहे. मंगळवारी आढळून आलेल्या रुग्णांमध्ये वसई पश्चिमेकडील २६, वसई पूर्वेकडील ५०, नालासोपारा पश्चिमेकडील ११, नालासोपारा पूर्वेकडील ६२, विरार पश्चिमेकडील १७, विरार पूर्वेकडील ४०, नायगाव पश्चिमेकडील तीन, नायगाव पूर्वेकडील १० रुग्णांचा समावेश आहे. तर, वसई-विरारमधील मात्र ठिकाण माहीत नाही, अशा एका रुग्णाचा यामध्ये समावेश आहे. त्यामुळे एकूण रुग्णसंख्या चार हजार १३७ झाली आहे.

तसेच, नालासोपाऱ्यातील दोन रुग्णांचा मृत्यू झाल्यामुळे एकूण मृत रुग्णांची संख्या ११७वर पोहोचली आहे. दिवसभरात १४८ रुग्ण करोनामुक्त झाल्याने घरी परतले आहेत. त्यामुळे आत्तापर्यंत एक हजार ९६८ रुग्ण बरे होऊन घरी परतले आहेत. तर, दोन हजार ५४ रुग्णांवर उपचार सुरू आहेत. पालिकेतर्फे आत्तापर्यंत २६ हजार ६२८ जणांची करोनाचाचणी करण्यात आली आहे. त्यातील ५२६ जणांचे अहवाल अजूनही अप्राप्त आहेत. तर, पाच हजार ४०४ जणांनी ११ दिवसांचा अलगीकरणाचा कालावधी पूर्ण केल्याचे पालिकेतर्फे सांगण्यात आले.