सहा दिवसांत २५ कोटींची वसुली

म. टा. वृत्तसेवा, उल्हासनगर

चलनातून रद्द करण्यात आलेल्या पाचशे आणि हजारच्या नोटा करभरणासाठी वापरण्याची मुभा मिळाल्याने तब्बल ५१ हजार मालमत्ताधारकांनी त्याचा फायदा घेतला. यामुळे पालिकेच्या तिजोरीमध्ये तब्बल पंचवीस कोटी रुपये जमा झाले आहेत. ही मुभा सरकारने २४ तारखेपर्यंत वाढविल्याने हा आकडा ४० कोटी रुपयांपर्यंत जाण्याची शक्यता आहे.

उल्हासनगर महापालिकेत सुमारे ३०० कोटी रुपयांची मालमत्ता कराची थकबाकी आहे. १ लाख ते १५ लाख रुपये मालमत्ता कर थ‌कीत असणाऱ्या मालमत्ताधारकांची संख्या ३ हजार, ५० हजार ते १ लाख रुपये मालमत्ता कर थकीत असणाऱ्या मालमत्ताधारकांची संख्या ५० हजारांच्या घरात होती. पालिका आयुक्त राजेंद्र निंबाळकर यांच्या आदेशाने

उपायुक्त जमीर लेंगरेकर, दादा पाटील, युवराज भदाणे यांच्या पथकांनी मालमत्ता जप्तीची प्रक्रिया करण्यास सुरुवात केली होती. मात्र त्यानंतरही मालमत्ताधारकांकडून किरकोळ वसुली होत होती. मागील आठवड्यात पाचशे आणि हजाराच्या नोटा चलनातून रद्द करण्याची घोषणा केल्यानंतर या नोटांचा वापर करून सरकारची देयके भरण्याची मुभा देण्यात आली. यासाठी पालिका मुख्यालय आणि किऑक्स सेंटरही रात्री १२ वाजेपर्यंत चालू ठेवण्यात आली होती.