२६/११चा हिरो गेला; टायगर कुत्र्याचा मृत्यू

मटा ऑनलाइन वृत्त । विरार

मुंबईवरील २६/११च्या हल्ल्यानंतर पोलिसांच्या बॉम्ब शोधक पथकाला स्फोटके शोधण्यास मदत करणारा पोलिसांच्या श्वान पथकातील 'टायगर' या कुत्र्याचा मृत्यू झाला आहे. २६/११नंतर मुंबईकरांच्या संरक्षणात महत्त्वाची भूमिका बजावणाऱ्या चार कुत्र्यांपैकी हा एक होता. टायगरच्या मृत्युमुळं अवघ्या चार महिन्यांत पोलीस दलाला तिसरा धक्का बसला आहे.

गोरेगाव येथील मुंबई पोलिसांच्या बॉम्ब स्क्वाडमध्ये टायगर, सुलतान, मॅक्स आणि मर्सी या कुत्र्यांनी एकत्र काम केलं होतं. अजमल कसाब व त्याचे ९ साथीदार ज्या-ज्या इमारतींमध्ये गेले होते, त्या सर्व ठिकाणी सुरक्षा पथकाने बॉम्ब स्क्वाडच्या मदतीने कसून तपासणी केली आणि स्फोटकांनी भरलेल्या बॅगा निकामी केल्या होत्या. या मोहिमेत टायगर, सुलतान, मॅक्स आणि मर्सी यांनी मोठी कामगिरी पार पाडली होती. या कुत्र्यांपैकी सुलतान व मॅक्सचा आधीच मृत्यू झाला आहे.

दहशतवाद्यांचे मनसुबे उधळून लावणाऱ्या या चार हिरोंपैकी मॅक्सने ८ एप्रिल रोजी आणि सुलतानने १८ जून रोजी अखेरचा श्वास घेतला. तर, लॅब्रॅडोर जातीच्या टायगरची 'फिझा फार्म' येथे काळजी घेतली जात होती. मात्र, दोन सहकाऱ्यांच्या मृत्युनंतर तो एकाकी झाला होता. फुफ्फुसाच्या आजारानं ग्रासलेल्या टायगरवर मे २०१५ पासून उपचार सुरू होते. मात्र, शुक्रवारी त्याची प्रकृती अधिकच खालावली आणि आज सकाळी त्याचा मृत्यू झाला,' अशी माहिती फिझा फार्मचे मालक फिझा शहा यांनी दिली. 'पोलीस दलातून निवृत्त झाल्यापासून मी टायगरची काळजी घेत होतो, त्याच्या फुफ्फुसांच्या आजारावर उपचार सुरू होते. पण डॉक्टरांचे प्रयत्न अयशस्वी झाले,' असं शहा यांनी सांगितलं. टायगरच्या मृत्यूनंतर आता एकटा मर्सी हा कुत्रा जीवंत आहे. तो सध्या विरार येथील 'फिझा फार्म'वर आहे.