२१ लाखांचे मोबाइल चोरीला

ठाणे : भिवंडीतील कुरियर अँड कार्गो कंपनीच्या गोदामातून ३८४० मोबाइल चोरल्याचा धक्कादायक प्रकार समोर आला आहे. या प्रकरणी नारपोली पोलिस ठाण्यात गुन्हा दाखल करण्यात आला आहे. याआधीही भिवंडीच्या विविध गोदामांसह मोबाइलच्या दुकानातून मोबाइल चोरीला जाण्याच्या घटना उघडकीस आल्या होत्या. त्यामुळे पुन्हा एकदा गोदामांच्या सुरक्षेचा प्रश्न ऐरणीवर आला आहे.

भिवंडी येथील माणकोली परिसरात शिवम कुरियर अँड कार्गो कंपनीचे गोदाम आहे. यामध्ये असलेल्या दोन गाळ्यांचे गुरुवारी रात्री चोरट्याने शटर उचकटून आत प्रवेश केला आणि गोदामात असलेले एकूण २१ लाख ४२ हजार रुपये किमतीचे ३८४० मोबाइलचे १९२ बॉक्स चोरले. या प्रत्येक बॉक्समध्ये २० मोबाइल होते.