म. टा. वृत्तसेवा, वसई
जमिनीच्या बनावट कागदपत्रांद्वारे अतिक्रमण करून बांधकाम घोटाळा केल्याचा प्रकार उघडकीस आला आहे. याप्रकरणी वसईत ४६ जणांविरोधात गुन्ह्याची नोंद करण्यात आली. यात महसूल, भूमी अभिलेख, महापालिका अधिकारी तसेच वकील यांच्याविरोधात तक्रारदाराने तक्रार दिल्याने त्यांच्यावरही गुन्हा नोंद केला गेला आहे.
वसईतील बंगली नाका सांडोर येथे राहणारे मायकल जॉन प्रधान यांनी वसई पोलिस ठाण्यात याविरोधात फिर्याद दिली आहे. बंगली सांडोर येथे ५ एकर २९ गुंठे जागा त्यांच्या पूर्वजांच्या नावे आहे व या जागेत अतिक्रमण करून हा जमीन घोटाळा झाल्याचे त्यांचे म्हणणे आहे. गेली ९ वर्षे प्रधान सरकारी खात्यांकडे याबाबत पाठपुरावा करीत आहेत. जिल्हा पोलिस अधीक्षक यांच्या आदेशानंतर हा गुन्हा नोंद केला गेला आहे. या प्रकरणातील आरोपींनी आपल्या कुटुंबीयांच्या मालकी जमिनीत १९२५ ते २०१८ या कालावधीत खोट्या कागदपत्रांच्या आधारे व बोगस माणसे उभी करून अतिक्रमण केले. दमदाटी करून जमीन बळकावली. अतिक्रमण करणारे तसेच ५ बिल्डर यांना महसूल अधिकारी-कर्मचारी, भूमीअभिलेख विभाग, महापालिका अधिकारी-कर्मचारी, वकील व इतर सरकारी अधिकारी-कर्मचारी यांनी कोणत्याही कागदपत्रांची शहानिशा न करता आर्थिक मोबदला घेऊन मदत केली. या जागेत सातहून अधिक इमारती बांधण्यात आल्या. कुटुंबीयांना जीवे मारण्याची धमकीही देण्यात आली, असे या तक्रारीत म्हटले आहे.
या प्रकरणी अतिक्रमणधारक, काही वकील, महसूल-भूमीअभिलेख, महापालिकेचे अधिकारी अशा संबंधित ४६ जणांवर गुन्हा नोंदविण्यात आला आहे. यात पालिकेचे अतिरिक्त आयुक्त, नगररचना विभागाचे अधिकारी, पालिकेचे संबंधित ज्युनिअर इंजीनिअर, तत्कालीन बिनशेती तहसीलदार, दुय्यम निबंधक, पालिकेच्या विधी विभागाचे वकील, आर्किटेक्ट यांच्याविरोधातही तक्रारदाराने फिर्याद दिली. ज्यांनी जमिनीवर अतिक्रमण केले व हा संपूर्ण जमीन घोटाळा केला, त्यांना संबंधित सरकारी अधिकाऱ्यांनी वेळोवेळी साथ दिली असल्याने त्यांच्याविरोधात तक्रार असल्याचे तक्रारदारांचे म्हणणे आहे. वसई पोलिस ठाण्यात याप्रकरणी गुन्हा दाखल करण्यात आला आहे. या गुन्ह्याचा तपास सुरू करण्यात आला आहे. अद्याप कुणालाही अटक करण्यात आली नाही, असे वसई पोलिसांनी सांगितले.