म. टा. प्रतिनिधी, ठाणे
लाचलुचपत प्रतिबंधक विभागाच्या (एसीबी) पालघर युनिटचे कार्यालय सुरू करण्यात येणार असून या युनिटसाठी एसीबीच्या ठाणे अधीक्षक कार्यालयातील ६ पदे पालघर युनिटमध्ये कामयस्वरूपी वर्ग केली जाणार आहेत. गृहविभागाने मंगळवारी पदे वर्ग करण्यास मान्यता दिली असून या पदामध्ये सहाय्यक पोलिस उप निरीक्षकांची दोन पदे, पोलिस हवालदार १, पोलिस नाईक २, पोलिस नाईक (चालक) १ या पदांचा समावेश आहे.
ठाणे जिल्ह्याचे विभाजन करत २०१४मध्ये पालघर जिल्हा अस्तित्वात आला होता. या जिल्ह्यासाठी लाचलुचपत प्रतिबंधक विभागाचे युनिट निर्माण करण्याविषयी शासनस्तरावर प्रयत्न चालू आहेत. या युनिटसाठी पोलिस दलातील विविध संवर्गातील कार्यकारी १८ पदे निर्माण करण्याचा आणि त्यासाठी ९१.१२ लाखांच्या खर्चास मान्यता देण्याचा प्रस्ताव शासनाकडे सादर करण्यात आला होता. हा प्रस्ताव वित्त विभागाच्या मान्यतेने उच्चस्तरीय सचिव समितीपुढे सादर केला होता. या समितीने ३ ऑगस्ट रोजी झालेल्या पाचव्या बैठकीमध्ये पालघर युनिटचे कार्यालय सुरू करण्यासाठी एसीबीच्या ठाणे पोलिस अधीक्षकांच्या आस्थापनेवरून सहा पदे वर्ग करण्यास मान्यता दिली होती. या मान्यतेनंतर गृहविभाग ही पदे कायमस्वरूपी वर्ग करण्याचा निर्णय घेतला असून याबाबत मंगळवारी आदेशही काढले. पोलिस अधिकारी आणि कर्मचारी यांची पदे सेवाप्रवेश नियमातील तरतुदीनुसार भरण्यात यावेत, असेही आदेश सरकारने दिले आहेत. एसीबीच्या ठाणे परिक्षेत्रात ठाणे, पालघर, नवी मुंबई, रत्नागिरी, रायगड, सिंधुदुर्ग आदी येत असून अधीक्षक कार्यालय ठाण्यातच आहे.