मुलांची फसवणूक दाम्पत्यावर गुन्हा दाखल
म. टा. प्रतिनिधी, ठाणे
परदेशातील गलेगठ्ठ नोकरी प्रत्येकाला हवी असते. त्यासाठी पैसेही मोजण्यास अनेकजण तयार असतात. मात्र, परदेशी नोकरीच्या नावाखाली तरुणांची फसवणूक होऊ लागली असून असेच एक प्रकरण ठाण्यात समोर आले आहे. दुबईतील नोकरीसाठी हजारो रुपये मोजणाऱ्या ३० तरुणांची अशीच फरफट झाली असून दुबईत नोकरीसाठी गेलेल्या या तरुणांना पुन्हा स्व:खर्चाने भारतात परतावे लागले आहे. तरुणांना दिलेले ऑफर लेटरही बनावट होते. व्हिसाही वेगळा असून या प्रकरणी ठाणेनगर पोलिस ठाण्यात दाम्पत्याविरुद्ध फसवणुकीचा गुन्हा दाखल करण्यात आला आहे.
मोबाइल दुरुस्तीचे काम करणारा नालासोपारा येथील मोहमद शोएब मोहमद अताहर सिद्धिकी (३२) हा नोकरीच्या शोधात होता. ठाण्यातील दादोजी कोंडदेव स्टेडियम येथील एस. के. इंटरप्रायजेसच्या कार्यालयाची माहिती समजली. एस. के. कडून तरुणांना परदेशात नोकरीसाठी पाठवले जात असून सिद्धिकीलाही परदेशात नोकरी करण्याची इच्छा असल्याने तो नोव्हेंबरमध्ये या कार्यालयात आला. यावेळी शफिक खान आणि त्याची पत्नी जरीनाबानो यांनी दुबईत एका मॉलमध्ये सेल्समनची नोकरी असल्याची माहिती दिली. मात्र, नोकरीसाठी ९० हजार रुपये भरावे लागतील, असेही दाम्पत्याने सिद्धिकीला सांगितले. तसेच पासपोर्ट जमा करण्याची अट होती. सिद्धिकी तयार झाल्यानंतर सुरुवातीला २० हजार रुपये दिले. इतरही मुलांनी नोकरीसाठी पैसे भरले. आरोपींनी व्हॉट्सअॅपवर व्हिसाही पाठवला. त्यानंतर हे सर्व तरुण दुबईला पोहचले. मॉलकडून कोणी घेण्यास येईल यासाठी तरुणांनी १८ तास विमानतळावर प्रतीक्षा केली. मात्र कोणीच न आल्याने अखेर तरुण स्वत:हून मॉलमध्ये गेले. तेथील अधिकाऱ्यांना ऑफर लेटर दाखवल्यानांतर ते खोटे असल्याचे समोर आले. या तरुणांना मॉलमधून हाकलून लावले. तरुणानी शफिक आणि जरीना यांना फोन केल्यानंतर नोकरी प्रक्रियेला वेळ लागतो असे उत्तर दिले. तरुणांनी त्यांच्याकडे असलेल्या व्हिसाबाबत चौकशी केल्यांनतर दुसराच व्हिसा निघाला. व्हिसाची मुदत संपण्याअगोदर दुबई न सोडल्यास कारागृहात जाण्याची वेळ ओढवू नये, यासाठी सर्वजण स्वखर्चाने भारतात परतले.
३० मुलांची २२ लाख ५२ हजाराची फसवणूक केल्याबद्दल शफिक आणि त्याच्या पत्नीविरोधात गुन्हा दाखल करण्यात आला आहे. दरम्यान, शफिक हा अन्य एका गुन्ह्यात न्यायालयीन कोठडीत असून लवकरच या गुन्ह्यात ताब्यात घेतले जाईल. तर त्याच्या पत्नीला अद्याप अटक करण्यात आलेली नाही, अशी माहिती पोलिसांनी दिली. आरोपींनी ठाण्यातील कार्यालय बंद केले असून पोलिस अधिक चौकशी करत आहेत.