ठाण्यातील 'त्या' ७९ वर्षीय वृद्धाचा मृत्यू करोनानेच; ‘एच३ एन२’ने मृत्यू झाल्याची होती शंका

म. टा. वृत्तसेवा, ठाणे : गेल्या काही दिवसांपासून जिल्ह्यात करोना आणि ‘एच३ एन२’चे रुग्ण झपाट्याने वाढत आहेत. गुरुवारी ठाणे महापालिकेच्या परिसरात एका ७९ वर्षीय वृद्धाचा खासगी रुग्णालयात ‘एच३ एन२’ने मृत्यू झाल्याचे सांगण्यात आले होते. मात्र, या रुग्णाचा मृत्यू करोनामुळे झाला असून, त्यांना ‘एच३ एन२’ची लक्षणे असल्याचे प्रशासनाने स्पष्ट केले आहे. गेल्या आठवड्यात करोनाचे रुग्ण वाढले असून, शुक्रवारी दिवसभरात ३५ रुग्ण आढळले. तर ‘एच३ एन२’च्या सहा रुग्णांची भर पडली आहे. तर आतापर्यंत करोनाचे ३१० उपचाराधीन रुग्ण आहेत. करोनामुळे मृत्यू झाल्याने आरोग्य प्रशासन खडबडून जागे झाले आहे.

ठाणे जिल्ह्यात मार्चच्या सुरुवातीपासूनच करोना रुग्णांच्या संख्येत दिवसागणित वाढ होत चालली आहे. मात्र २०२३मध्ये करोनामुळे मृत्यू झाल्याची घटना गुरुवारी घडली. ३५ करोना रुग्णांपैकी २६ रुग्ण हे पालिका क्षेत्रातील असल्याची नोंद आहे, असे आमदार प्रताप सरनाईक यांनी म्हटले आहे. ठाणे महापालिका हद्दीमध्ये अनेक विकास प्रकल्प सुरू आहेत. त्यामध्ये प्रामुख्याने आपल्या मतदारसंघातील पोखरण रोड नं. २ वरील निळकंठ, दामजी-शामजी, टाटा, इंडिया बुल, शेठ ग्रुप यांच्यासह अनेक विकासकांची कामे चालू आहेत. या प्रकल्पांमध्ये कामगारांच्या आरोग्यविषयक कोणतीही खबरदारी घेत नसल्याचे आढळून येत आहे. त्यापैकी पोखरण रोड नं. २ वरील कोर्टयार्ड नावाच्या विकासकाने विकास प्रकल्पामध्ये रेडिमिक्सची धूळ, त्याचप्रमाणे बांधकामासाठी लागणाऱ्या पाण्यासाठी खोदलेल्या खड्यामधील पाण्यात अनेक प्रकारच्या रोगजंतूंचा प्रादुर्भाव होण्याची शक्यता नाकारता येत नाही. त्यामुळे महापालिका हद्दीमध्ये एच३एन२ या आजाराचा प्रसार होणार नाही याची काळजी महापालिकेने घेण्यासंदर्भात संबंधितांना निर्देश द्यावेत, अशी मागणी आमदार प्रताप सरनाईक यांनी केली आहे.

गुरुवारी महापालिका हद्दीत ज्या रुग्णाचा मृत्यू झाला, तो करोनामुळे झाला असून, त्यांच्यामध्ये ‘एच३ एन२’ची लक्षणे आढळून आली आहेत. करोना आणि ‘एच३ एन२’बाबत यंत्रणा सज्ज आहे.- डॉ. कैलाश पवार, शल्यचिकित्सक, ठाणे