ठाण्यातील बाळकुम परिसरातील दुर्घटना
कंत्राटदाराविरुद्ध गुन्हा दाखल
म. टा. वृत्तसेवा, ठाणे
रंगकामासाठी १८ मजली इमारतीला लावलेली बांबूची परांची काढत असताना अचानक ती तुटली. त्यामुळे परांचीसह खाली पडून आठ मजूर जखमी झाल्याची घटना सोमवारी सकाळी बाळकुम येथील रुणवाल गार्डन सिटी येथे घडली. यामध्ये चार मजूर जखमी आहेत. गंभीर बाब म्हणजे मागील दीड वर्षांपासून इमारतीला असलेली बांबूची परांची कुजली होती. या प्रकरणी कापूरबावडी पोलिस ठाण्यात कंत्राटदाराविरुद्ध गुन्हा दाखल करण्यात आला आहे.
बाळकुम येथील रुणवाल गार्डन सिटीमध्ये १८ मजली इमारतीच्या रंगकाम तसेच अन्य कामांसाठी बांबूची परांची लावण्यात आली होती. या इमारतीत नागरिकही राहत असून ही परांची काढून टाकण्यासाठी दादा नाना कुंभार या कंत्राटदारामार्फत मजूर लावण्यात आले होते. सोमवारी सकाळी १०.३० वाजता परांची काढण्याचे काम सुरू असताना अचानक आठ मजूर परांचीसह खाली कोसळले. घटनास्थळी तातडीने अग्निशमन दल, प्रादेशिक आपत्ती व्यवस्थापन कक्षाचे अधिकारी, कर्मचारी आणि पोलिस दाखल झाले. जखमींना तातडीने रुग्णालयात हलविले. हासन अली (३६), जमाल कमरुद्दीन शेख (४५), मोहमद रॉयल शेख (२१), मणीरुद्दीन शेख (२७), रफीउल शेख (३२), दुलाल तुजार शेख (३५), मो. इस्ताहक शेख (१८), अली अन्सारी शेख असे एकूण आठ मजूर या दुर्घटनेत जखमी झाले. यामध्ये चार मजूर जबर जखमी झाले आहेत. यातील सहा मजुरांवर खासगी रुग्णालयात आणि दोन मजुरांवर सिव्हिल रुग्णालयात उपचार सुरू आहेत. मजुरांच्या सुरक्षिततेबाबत संबंधित कंत्राटदाराने आवश्यक उपाययोजना केल्या नव्हत्या. कंत्राटदार दादा कुंभार याच्याविरुद्ध गुन्हा दाखल करण्यात आल्याची माहिती वरिष्ठ पोलिस निरीक्षक के. ई. करपे यांनी दिली. या गुन्ह्याचा तपास पोलिस उपनिरीक्षक एन. बी. गिरासे करत आहेत.