आरोपीमध्ये अल्पवयीन मुलांचाही समावेश
म. टा. प्रतिनिधी, ठाणे
तांब्याच्या धातूचे महागडे ब्रास व्हॉल्व्ह चोरणाऱ्या दोन अल्पवयीन मुलांसह भंगार दुकानदार अशा एकूण पाच जणांना नारपोली पोलिसांनी अटक केली आहे. आरोपींकडून दोन लाख ३२ हजार ४५२ रुपयांचे ३३ व्हॉल्व्ह जप्त करण्यात आले आहेत.
भिवंडीतील दापोडा भागात एमएक्स सिस्टीम्स इन्टरनॅशनल प्रा. लिमिटेड कंपनीचे गोदाम असून या गोदामात २ नोव्हेंबर ते ४ नोव्हेंबर या कालावधीत चोरांनी तांब्याच्या धातूच्या ब्रास व्हॉल्व्हची चोरी केली होती. एका व्हॉल्व्हची किंमत ७ हजार ४४ रुपये असून या प्रकरणी मयुर पवार यांनी दिलेल्या तक्रारीनंतर नारपोली पोलिस ठाण्यात गुन्हा दाखल करण्यात आला होता. चोरांचा शोध घेणे तितके सोपे नव्हते. परंतु नारपोली पोलिसांनी दिवसरात्र शोधकार्य राबविले. तसेच, घटनास्थळी असलेल्या सीसीटीव्ही फुटेजच्या आधारे पोलिस उपनिरीक्षक आर. जे. व्हरकाटे यांनी अक्षय पाटील (२३), किशोर पाटील (२०) आणि नरेंद्र मिश्रा (४०) या तिघांना अटक केली. तसेच, दोन अल्पवयीन मुलांना ताब्यात घेतले आहे. अक्षय हा वडापाव विक्रीच्या तर किशोर ट्रान्सपोर्ट व्यवसायात आहे. या आरोपींनी चोरीचा माल भंगार दुकानदार नरेंद्र याला विकला होता. त्याच्याकडून हा मुद्देमाल जप्त करण्यात आला आहे. वरिष्ठ पोलिस निरीक्षक मालोजी शिंदे यांच्या मार्गदर्शनाखाली गुन्ह्याची उकल करण्यात आली.