पोलीसही चक्रावले, तडीपार गुंडाने त्याच पोलीस ठाण्याच्या हद्दीत केले हे कृत्य

उल्हासनगर : उल्हासनगर शहर आणि ठाणे जिल्ह्यातून तडीपार केलेल्या गुंडाची सध्या शहरात चर्चा आहे. याचे कारण ठरले आहे त्याने केलेली चोरी. या तडीपार गुंडाने त्याच्या साथीदाराच्या मदतीने कपडे चोरी करून नेल्याचं सीसीटीव्हीत निष्पन्न झाले. त्यानंतर उल्हासनगरच्या मध्यवर्ती पोलिसांनी तडीपार गुंड आणि त्याच्या साथीदाराला अटक केली आहे. पोलिसांनी या आरोपींकडून चोरीचे कपडे हस्तगत केले आहेत. (A gangster stole clothes in Ulhasnagar)

उल्हासनगरच्या स्टेशन रोडवर दृष्टी कलेक्शन नावाचे कपड्याचे दुकान आहे. काही दिवसांपूर्वी या दुकानात भरदिवसा दोन अज्ञात तरुण आले. या तरुणांनी दुकानदाराला शर्ट आणि पॅन्ट असे कपडे दाखवण्यास सांगितले. दुकानदाराने कपडे दाखवण्यास सुरुवात केल्यावर ग्राहक म्हणून दुकानात आलेल्या दोघांनी ते कपडे एका जम्बो पिशवीत भरले आणि दुकानदाराला धमकावून कपडे घेऊन निघून गेले.

क्लिक करा आणि वाचा- कल्याण-डोंबिवलीकरांची चिंता वाढवणारी बातमी! आतापर्यंत दोन जणांचा स्वाइन फ्लूने मृत्यू

या प्रकरणी दुकानदाराने मध्यवर्ती पोलीस ठाण्यात या गुडांच्या विरोधात तक्रार दाखल केली. या तक्रारीनंतर पोलिसांनी दुकानाचे सीसीटीव्ही तपासले. त्यामध्ये त्यांना आपल्याच पोलीस ठाण्यातून तडीपार करण्यात आलेला गुंड हे कपडे घेऊन गेल्याचं निष्पन्न झालं. सीसीटीव्हीच्या आधारे मध्यवर्ती पोलिसांनी आरोपींचा तपास केला. त्यानंतर मिळालेल्या माहितीच्या आधारे तडीपार गुंड पंकज करोतीया आणि प्रशांत लोखंडे या त्याच्या साथीदाराला उल्हासनगरमधून अटक करण्यात आली.

क्लिक करा आणि वाचा- पालिकेकडून मोठी चूक! भारतीय जवान आणि तिरंग्याचा अपमान; शेवटी पांढऱ्या रंगाने पुसली चित्रे

मध्यवर्ती पोलीस ठाण्यात तडीपार गुंड पंकज करोतीया याच्यावर दोन गुन्हे दाखल करण्यात आले आहेत. या गुंडाने गुन्ह्यात वापरलेली एक गाडी सुद्धा मध्यवर्ती पोलिसांनी जप्त केली आहे. त्याच्याकडून चोरीचे कपडेसुद्धा हस्तगत केल्याची माहिती मध्यवर्ती पोलीस ठाण्याचे वरिष्ठ पोलीस निरीक्षक मधुकर कड यांनी दिली आहे.

क्लिक करा आणि वाचा- मंत्रिमंडळ विस्तारापूर्वी मनसेचा सरकारला इशारा;...जे चाललंय ते सर्वच खपवून घेणार नाही