राम सुरोशी, मुंबई विद्यापीठ
प्रत्येक विषयाला, भाषेला आपला असा एक इतिहास असतो. मात्र आधुनिक काळात हा इतिहास लुप्त होताना दिसून येत आहे. यासाठीच विद्यार्थांना इतिहासाची माहिती तसेच या विषयाबद्दल त्यांच्यात रुची निर्माण व्हावी, या उद्देशाने इंडियन एज्युकेशन सोसायटीच्या ओरायन विद्यालयात 'ग्लिम्पसेस ऑफ हिस्ट्री' या विषयावर एक दिवसीय प्रदर्शन भरविले होते. शाळेच्या संस्थेचे अध्यक्ष सागर सुळे व शाळेच्या मुख्याध्यापिका प्रतिभा प्रभू तसेच इतर मान्यवरांच्या उपस्थितीत याप्रदर्शनाचे उद्घाटन करण्यात आले.
अश्मयुगापासून आधुनिक युगातील तंत्रज्ञानाचा इतिहास मांडण्याचा प्रयत्न या प्रदर्शनात केला गेला. यात मानवयुग, गणित, रसायन, जीवशास्त्र, भूगोल तसेच मराठी, हिंदी व इंग्रजी या तिन्ही भाषेसह विविध विषयातील इतिहासाचा समावेश करण्यात आला होता. शिवाय विद्यार्थ्यांनी प्रकल्पाबरोबरच विविध कार्यक्रमही आयोजित केले होते. या प्रदर्शनात बालवाडी ते आठवीपर्यंतच्या सुमारे १२०० विद्यार्थ्यांनी भाग घेतला होता. प्राथमिक विभागात प्रत्येकी एक व माध्यमिक विभागात प्रत्येकी दोन प्रकल्प करण्यात आले होते. प्रकल्पानुरूप विद्यार्थ्याची गटविभागणी करण्यात आली होती. याला शिक्षकांच्या मार्गदर्शनाखाली विद्यार्थ्यांनी विद्यालयातच मूर्त रूप दिले होते. विशेष उल्लेख करण्यासारखी गोष्ट म्हणजे या लहाग्यांनी पालकांसाठी प्रश्नमंजुषा आयोजित केले होते. यात सर्व पालकांनी उत्साहाने सहभाग घेत कार्यक्रमाचा माहोल अधिक खुलवला.