पंतप्रधान पीक विमा योजनेसाठी आधार सक्ती

म. टा. वृत्तसंस्था, पालघर
पंतप्रधान पीक विमा योजनेत सहभागासाठी शेतकऱ्यांना आता आधार क्रमांक अनिवार्य करण्यात आला असून त्याची अंमलबजावणी खरीप २०१७पासून करण्यात येणार आहे.
पंतप्रधान पीक विमा योजना व हवामान आधारित फळ पिक विमा योजनेमध्ये सहभागी होणाऱ्या शेतकऱ्यांसाठी आधार क्रमांक अनिवार्य करण्यात आला आहे. या योजनांसाठी आधार क्रमांक संलग्न केलेल्या बँक खात्याच्या वापरामुळे योजनेची अंमलबजावणी जलद होणार आहे. शेतकऱ्यांना पीक विम्याची नुकसान भरपाई विमा कंपनीकडून खात्यावर थेट जमा करणे सुलभ होणार आहे.
राज्यात खरीप २०१६ पासून राज्यातील सर्व जिल्ह्यांमध्ये अधिसूचित क्षेत्रातील अधिसूचित पिकांसाठी राबविण्यात येत आहे. केंद्र शासनाच्या ८ फेब्रुवारी, २०१७च्या राजपत्रान्वये खरीप हंगाम २०१७ पासून प्रधानमंत्री पीक विमा योजना व फळपीक विमा योजनेत सहभागी होणाऱ्या सर्व कर्जदार व बिगर कर्जदार शेतकऱ्यांना आधार कार्ड प्रमाणिकरण करणे अनिवार्य करण्यात आले आहे.