लाचखोर एजंट एसीबीच्या जाळ्यात

ठाणे : ड्रायव्हिंग लायसन्स ट्रान्सफर करण्यासाठी तसेच तेथील पत्ता बदलण्यासाठी एक हजार रुपयांची लाच स्वीकारणारा ठाणे आरटीओ कार्यालय येथील खासगी एजंट शाहिद जामलुद्दीन शेख (२९) याला बुधवारी ठाणे लाचलुचपत प्रतिबंधक विभागाने अटक केली आहे.

आरटीओमधील विविध कामांना लागणारा वेळ लक्षात घेऊन ग्राहक एजंटकडे धाव घेतात. मात्र त्यांच्याकडून मोठ्या प्रमाणावर लूट होत असल्याच्या तक्रारी पुढे येत आहेत. अशाच एका प्रकरणात लाचलुचपत प्रतिबंधक विभागाने कारवाई केली. या प्रकरणी गुन्हा दाखल करण्यात आला असून पोलिस उप अधीक्षक दीपक दळवी तपास करत आहेत. परंतु ठाणे आरटीओ कार्यालयात अद्यापही खाजगी एजंटचा सुळसुळाट झाल्याचे दिसत आहे.