पालिका शिक्षकांचे प्रसंगावधान

अॅसिड ट्रक उलटल्यानंतर विद्यार्थ्यांना सुरक्षितस्थळी हलवले

म. टा. वृत्तसेवा, ठाणे

हॅड्रोक्लिरिक अॅसिडच्या ड्रम्सची वाहतूक करणारा कंटेनर उलटल्याने परिसरात तयार झालेल्या प्रदूषणाचा फटका विद्यार्थ्यांना बसू नये, यासाठी जकातनाका येथील महापालिकेच्या शाळेने परीक्षेसाठी आलेल्या विद्यार्थ्यांचे स्थलांतर केले. शाळेच्या परिसरात सकाळी घडलेल्या या दुर्घटनेचा परिणाम विद्यार्थ्यांच्या आरोग्यावर होऊ नये यासाठी शाळा प्रशासनाने काही मिनिटांत गायमुख येथील शाळेच्या जुन्या इमारतीत विद्यार्थ्यांच्या परीक्षेची सोय केली.

सकाळी पावणेसातच्या सुमारास जकातनाका येथे हॅड्रोक्लोरिक अॅसिडचे ड्रम्स घेऊन जाणारा कंटेनर उलटला. कंटेनरचे चाक उघड्या असलेल्या ड्रेनेज पाइपवर पडल्याने कंटेरचा हा अपघात झाल्याचे सांगण्यात आले. अपघाताचे स्वरूप गंभीर नसले तरी त्यातील अॅसिड रस्त्यावर सांडल्याने हवेत दुर्गंधी पसरली होती. महापालिकेची गायमुख शाळा हाकेच्या अंतरावर असल्याने शाळेतील विद्यार्थ्यांना मोठा धोका निर्माण झाला होता. शाळेची सहामाही परीक्षा सुरू असल्याने शाळा रद्द करणेही शाळा प्रशासनास शक्य नव्हते. मात्र मुख्याध्यापक डेल्फीना परेरा यांनी परिस्थितीचा अंदाज घेत अवघ्या काही मिनिटांत विद्यार्थ्यांच्या परीक्षेची सोय जुन्या इमारतीत करण्यात आली. येथील जुनी खोली बंद असल्याने त्याची स्वच्छता, आवश्यक साहित्य या सर्वांची व्यवस्था शिक्षकांसह इतर कर्मचाऱ्यांनी केली आणि सकाळी पाचवी ते आठवीच्या वर्गातील ६२ विद्यार्थ्यांची परीक्षा घेण्यात आली. त्यानंतर दुपारच्या सत्रात पहिली ते चौथीच्या १०० विद्यार्थ्यांचीही परीक्षा जुन्या शाळेत घेण्यात आली. शाळेच्या प्रसंगावधानामुळे विद्यार्थ्यांच्या आरोग्यास हानी झालेली नाही.

अपघातग्रस्त ठिकाणी आर. डी. एम. सी आणि बाळकुम अग्निशमक दलाने सोडियम बायकार्बोनेट्स पावडरचा वापर करत रस्त्यावरील अॅसिडची स्वच्छता तातडीने केल्याने परिसरातील धोका टळला आहे. याबाबत मुख्याध्यापिका डेल्फीना परेरा म्हणाल्या,‘ विद्यार्थ्यांची सुरक्षितता महत्वाची असून त्यासाठी हे स्थलांतर करावे लागले. धावपळ झाली असली तरी सर्वांच्या एकत्रित सहकार्याने आणि प्रसंगावधान राखल्याने परीक्षा सुरळीत घेता आली.’