अॅसिड फेकण्याची धमकी

म. टा. वृत्तसेवा, ठाणे

मुलीच्या आईला फोन करून ‘माझे तुमच्या मुलीशी लग्न लावून न दिल्यास मुलीवर अॅसिड फेकेन,’ अशी धमकी देणाऱ्या आरोपीविरुद्ध कासारवडवली पोलिस ठाण्यात गुन्हा दाखल करण्यात आला आहे. अद्याप आरोपीला अटक करण्यात आली नसल्याची माहिती वरिष्ठ पोलिस अधिकाऱ्याने दिली.

पीडित २४ वर्षीय मुलगी शिक्षिका असून ती घोडबंदर रोड परिसरात राहते. आरोपी संजय उर्फ सुनील तिवारी (३०) हा तिचा पाठलाग करत होता. त्यामुळे ही मुलगी घाबरली होती. मात्र सुनील इतक्यावरच थांबला नाही तर, त्याने मुलीच्या आईला फोनही केला. माझे तुमच्या मुलीशी लग्न लावून न दिल्यास तिचे अपहरण करेन, असे सांगत त्याने मुलीवर अॅस‌िड फेकण्याची धमकीही दिली. आरोपीने मुलीच्या आईलादेखील मारण्याची धमकी दिली असून हा प्रकार गेल्या जूनपासून सुरू होता. शिक्षिकेने दिलेल्या तक्रारीनंतर आरोपीविरुद्ध गुन्हा दाखल करण्यात आला आहे.