फळविक्रेत्यांवर संयुक्त कारवाई

रासायनिक प्रक्रिया करून पिकवलेले आंबे जप्त

म. टा. वृत्तसेवा, उल्हासनगर

शहरातील फेरीवाल्यांसोबत फळ विक्रेत्यांचे प्रमाण शहरात वाढत आहे. याच फळविक्रेत्यांकडून रासायनिक प्रक्रियेचा वापर करून पिकवलेल्या विषारी फळांची विक्री होत असल्याच्या तक्रारी पालिकेकडे आल्या होत्या. यावरून शुक्रवारी अन्न व औषध प्रशासन आणि पालिकेच्या पथकाने शहरातील अनेक फळ विक्रेत्यांवर संयुक्त कारवाई केली. यात ८९० किलो आंबे जप्त करण्यात आले.

उन्हाळ्यात नागरिकांकडून मोठ्या प्रमाणात आंब्यांची मागणी होत असते. त्यासाठी शहरात मोठ्या प्रमाणात आंब्यांची आवकही झाली आहे. मात्र यातील अनेक फळ विक्रेते आंबे लवकर पिकावेत, यासाठी कॅल्शियम कार्बाइडचा वापर करत असल्याच्या तक्रारी महापालिकेला प्राप्त झाल्या होत्या. या तक्रारींत शहरातील होलसेल व्यापाऱ्यांची नावे आणि पत्तेही देण्यात आले होते. अखेर शुक्रवारी सकाळी अन्न व औषध प्रशासन अधिकारी एस. एन ओझरकर, ए. आर. देशमुख, कर्डक आणि खरात या पथकाने तसेच पालिकेच्या अधिकाऱ्यांचे पथक यांनी शहरातील विविध फळविक्रेत्यांच्या गाड्यांवर छापा टाकला. या छाप्यात अनेक विक्रेत्यांकडील फळांवर रासायनिक पद्धतीचा वापर करत फळे पिकवल्याचे अन्न व औषध प्रशासनाच्या अधिकाऱ्यांच्या निदर्शनास आले. यात गोल मैदान येथील साधु बैला चौक, मेघराज फुड मर्चंट, वासुदेव परसी, ढोलाराम दरबार जवळील जितू लालवाने या व्यापाऱ्यांविरुद्ध अन्न व औषध प्रशासनाने कारवाई केली आहे.

या छाप्यात फळ विक्रेत्यांकडून ८९० किलो आंबे जप्त करण्याता आले. हे सर्व आंबे पालिकेच्या डम्पिंग ग्राऊण्डवर नष्ट करण्यात येणार असल्याचे पालिकेचे उपायुक्त जमीर लेंगरेकर यांनी सांगितले. शहरातील इतर भागात फळविक्रेत्यांकडून अशा प्रकारे विषारी फळे विकण्याच्या तक्रारी आल्यास त्या विक्रेत्यांविरोधातही कारवाई करण्यात येणार असल्याचेही उपायुक्तांनी सांगितले. नागरिकांनीही फळे विकत घेताना सावधानता बाळगण्याचे आवाहनही पालिकेने केले आहे.